Chandrababu – Revanth: తెలుగు రాష్ట్రాల రాజకీయాల్లో విశేషమైన చరిత్ర కలిగిన చంద్రబాబు నాయుడు, రేవంత్ రెడ్డిల గురుశిష్య సంబంధం అందరికీ తెలిసిందే. ఒకప్పుడు టీడీపీ ద్వారా రేవంత్ రెడ్డి రాజకీయాల్లో కీలక స్థాయికి ఎదిగేందుకు చంద్రబాబు మద్దతు అందించారు. కానీ, ప్రస్తుతం వేర్వేరు పార్టీల్లో ఉన్నా, వారి సంబంధం అనుబంధానికి ఒక నిదర్శనం. ఇటీవల స్విట్జర్లాండ్‌లోని దావోస్‌లో జరుగుతున్న వరల్డ్ ఎకనమిక్ ఫోరమ్ సదస్సుకు హాజరైన చంద్రబాబు, రేవంత్ రెడ్డి, జ్యూరిచ్ ఎయిర్‌పోర్టులో అనూహ్యంగా కలుసుకున్నారు.
ఆ సందర్భంగా రేవంత్ తన గురువును ఆత్మీయంగా కలుసుకుని కుశల ప్రశ్నలు అడిగారు. చంద్రబాబు కూడా రేవంత్‌ను ఆప్యాయంగా పలకరించి ఇద్దరూ కాసేపు చర్చలు జరిపారు.ఈ భేటీలో చంద్రబాబు నాయుడుతో పాటు నారా లోకేశ్, కింజరాపు రామ్మోహన్ నాయుడు వంటి నేతలు పాల్గొన్నారు. రేవంత్ వెంట ఉన్న తెలంగాణ మంత్రి శ్రీధర్ బాబును కూడా చంద్రబాబు సంతోషంగా కలుసుకుని పాత స్నేహాలను గుర్తు చేసుకున్నారు.
శ్రీధర్ బాబు తండ్రి శ్రీపాదరావుతో చంద్రబాబుకు ఉన్న స్నేహం ఈ సందర్భంగా మరోసారి ప్రస్తావనకు వచ్చింది. దావోస్ సదస్సు ప్రారంభానికి ముందు, ఇరువురు సీఎంలు జ్యూరిచ్‌లో ఒకరిని ఒకరు కలుసుకోవడం అక్కడున్న వారందరినీ ఆకట్టుకుంది. వేర్వేరు రాష్ట్రాలను ప్రతినిధ్యం వహిస్తూ పెట్టుబడులు ఆకర్షించే దిశగా తమ పనులను ముందుకు తీసుకెళ్లేందుకు సిద్దమవుతున్నారు. తెలుగు రాష్ట్రాలకు అనుకూలమైన పెట్టుబడులు తీసుకురావడంలో ఇద్దరు నేతలు తమదైన శైలిలో ప్రయత్నాలు చేస్తుండగా, వారి ఈ భేటీ రాజకీయంగా కూడా ప్రత్యేకంగా నిలిచింది.
