జనసేన అధినేత పవన్ కల్యాణ్ ఇక మారే అవకాశం లేదని స్పష్టమైపోయింది. తాజాగా జగన్మోహన్ రెడ్డి నూరు రోజుల పరిపాలనపై పవన్ చేసిన ఆరోపణలు, విమర్శలను గమనిస్తే మారడన్న విషయం రూఢీ అయిపోతుంది. ఎందుకంటే తాజాగా పవన్ చేసిన ఆరోపణలన్నీ ఆల్రెడీ చంద్రబాబునాయుడు చేస్తున్నవే. ఎంతసేపు జగన్ ను టార్గెట్ చేసుకోవాలన్న ఆలోచన తప్ప ఇంకోట కనబడటమే లేదు.
చంద్రబాబు అధికారంలో ఉన్నపుడూ ప్రతిపక్ష నేతగా ఉన్న జగన్నే టార్గెట్ చేసేవారు. చంద్రబాబు ప్రతిపక్షంలోకి వచ్చిన తర్వాత కూడా అధికారంలోకి వచ్చిన జగన్నే టార్గెట్ చేస్తున్నారు పవన్. పవన్ ఆలోచనేంటంటే చంద్రబాబుకు మద్దతుగా నిలబడుతూ జగన్ ను విమర్శించటమే.
మొన్నటి ఎన్నికలకు ముందు ఇటువంటి ఆలోచనలతోనే పవన్ ఎటూ కాకుండా పోయాడు. పోటి చేసిన భీమవరం, గాజువాక నియోజకవర్గాల్లో ఎక్కడ కూడా జనాలు నమ్మకుండా పవన్ ను ఓడగొట్టారంటేనే పవన్ పరిస్ధితేంటో అర్ధమైపోతోంది. అందిరికీ అర్ధమైన విషయం కూడా పవన్ కు అర్ధం కావటం లేదు. అందుకనే వైసిపి నేతలు పవన్ ను ప్యాకేజీ స్టార్ అంటూ ఆరోపిస్తున్నది.
పవన్ సమస్యేమిటంటే సొంతంగా రాజకీయాలు చేసేంత ఓపిక, బుర్రా రెండు లేవు. అలాగానే బహిరంగంగా చంద్రబాబుతో నేరుగా పొత్తు పెట్టుకోవటం ఇష్టం లేదు. అందుకనే మొన్నటి ఎన్నికల్లో దారుణంగా దెబ్బతిన్నారు. తన పద్దతి మార్చుకోకపోతే రేపటి స్ధానిక సంస్ధల ఎన్నికల్లో కూడా ఇదే పరిస్ధితి పునరావృతమవుతుందనటంలో ఎటువంటి సందేహం లేదు.