ప్రముఖ తమిళ దర్శకుడు సెల్వ రాఘవన్ దర్శకత్వంలో తమిళ్ స్టార్ హీరో సూర్య ప్రధాన పాత్రలో తెరకెక్కిన చిత్రం ఎన్జీకే(నంద గోపాల కృష్ణ). ఈ సినిమాలో సూర్య సరసన రకుల్, సాయి పల్లవి హీరోయిన్లుగా నటిస్తున్నారు. ఈ సినిమాకు సంబంధించిన తెలుగు, తమిళ టీజర్లను నేడు చిత్ర యూనిట్ విడుదల చేసింది.
ఈ చిత్రంలో సూర్య చెవిటి వాడని తెలుస్తోంది. అలాగే రాజకీయాల చుట్టూ కథ తిరుగుతుంది. ఈ సినిమా ట్రైలర్ చూస్తూంటే రామ్ చరణ్ రంగస్దలం గుర్తుకు వస్తోందంటున్నారు అభిమానులు.
‘నాపేరు ఎన్జీకే. నంద గోపాల కుమారన్. అందరూ ఎన్జీకే అని పిలుస్తారు’ అంటూ సూర్య చెబుతున్న డైలాగ్‌తో టీజర్ మొదలైంది. ఇందులో సూర్య చెవిటివాడి పాత్రలో నటిస్తున్నట్లు టీజర్‌ను బట్టి అర్థమవుతోంది. అలాంటిది అతను రాజకీయాల్లోకి వెళ్లాలనుకుంటాడు. ఈ విషయం తెలిసి అందరూ షాకవుతారు.
కానీ కుమారన్ భార్య (సాయి పల్లవి) మాత్రం అతనికే మద్దతు తెలుపుతుంది. ‘నీలాంటి వాడు రాజకీయాల్లోకి వస్తే దేశం ఎంత బాగుపడుతుందో ఆలోచించి చూశాను.. ’ అంటూ ఎగతాళి చేసినవారే మళ్లీ గోపాలకు మద్దతు తెలుపుతారు. ఆ తర్వాత ఏం జరిగింది? అన్నదే కథ. యువన్‌ శంకర్‌రాజా ఈ చిత్రానికి సంగీతం అందిస్తున్నారు. త్వరలో ఈ సినిమాను ప్రేక్షకుల ముందుకు తీసుకురానున్నారు.