సెకెండ్ ఇన్నింగ్స్ కోసం తహ తహ!
‘ఒక్క ఛాన్స్’ అంటూ హీరోయిన్‌గా ఖడ్గంలో నిర్మాతలను బతిమాలుకున్న పల్లెటూరి అమ్మాయి పాత్రతో పాపులరైన సంగీత నటనను మర్చిపోలేం. అంతకుముందే అటు తమిళం, ఇటు తెలుగులో ఆమె పాత్రలు చేసినా, ఖడ్గం చిత్రంతో ఓ క్రేజ్ తెచ్చుకుంది. శివపుత్రుడు, ఖుషీఖుషీగా, పెళ్లాం ఊరెళితే చిత్రాలతోనూ మెప్పించిన సంగీత చాలా కాలంగా సెకెండ్ ఇన్నింగ్స్ మొదలుపెట్టేందుకు ఉత్సాహంగా ఎదురు చూస్తుంది.
ఆ చాన్స్ ఇప్పుడు అనిల్ రావిపూడి చిత్రంతో దక్కినట్టు తెలుస్తోంది. మహేష్‌తో అనిల్ రావిపూడి తెరకెక్కిస్తోన్న చిత్రం సరిలేరు నీకెవ్వరు. ఈ సినిమాలో సంగీత ఓ కీలక పాత్రలో కనిపించనుందని సమాచారం. సంగీతతోనే ఆ పాత్ర చేయిస్తే పండుతుందని గట్టిగా నమ్ముతున్న అనిల్, అందుకు ఆమెను ఒప్పించినట్టు తెలుస్తోంది. ఇప్పటికే చాలా గ్యాప్ తరువాత విజయశాంతిని మళ్లీ స్క్రీన్ మీదకు తీసుకొస్తున్న అనిల్, ఇప్పుడు సంగీతనూ ఓ పాత్ర కోసం ఒప్పించటంతో సినిమాపై ఆసక్తి పెరుగుతోంది.
ఈ ప్రాజెక్టులో మహేష్‌తో రష్మిక జోడీ కట్టడం, విజయశాంతి, సంగీత, బండ్ల గణేష్ రీ ఎంట్రీలతోపాటు రాజేంద్రప్రసాద్ వంటి ఆర్టిస్టులు కీలక పాత్రలు చేస్తుండటంతో -సరిలేరు నీకెవ్వరుపై ఆడియన్స్ ఫోకస్ పెరుగుతోంది. దిల్‌రాజు, అనిల్ సుంకర, మహేష్ సంయుక్తంగా ఈ చిత్రాన్ని నిర్మిస్తున్నారు. ఈ విషయం గురించి సంగీతను అడిగితే- చిరునవ్వు విసిరి చెక్కేసింది! చూద్దాం సెకెండ్ ఇన్నింగ్స్ కోసం తహ తహలాడుతున్న సంగీతకు ఇకనైనా టాలీవుడ్ ఓ సూపర్ కెరీర్ని ఇస్తుందని ఆశిద్దాం!