#ఆర్ఆర్ఆర్: టైటిల్ వెబ్రివేషన్ వీటిల్లో ఏది?

ప్రముఖ దర్శకుడు రాజ‌మౌళి తెర‌కెక్కిస్తున్న భారీ మ‌ల్టీ స్టార‌ర్ చిత్రం ఆర్ఆర్ఆర్. ప్ర‌స్తుతం షూటింగ్ ద‌శ‌లో ఉన్న ఈ చిత్రంలో రామ్ చ‌ర‌ణ్‌, ఎన్టీఆర్ ప్రధాన పాత్ర‌ల‌లో న‌టిస్తుండ‌గా, అలియా భ‌ట్ హీరోయిన్ గా న‌టిస్తుంది. దాదాపు 350 కోట్ల రూపాయ‌ల బ‌డ్జెట్‌తో రూపొంద‌నున్న ఈ సినిమా తెలుగుతోపాటు ప‌లు ఇత‌ర భార‌తీయ భాష‌ల్లో కూడా విడుద‌ల‌వుతోంది. ఈ మల్టీ స్టార‌ర్ మూవీకి అన్ని భాష‌ల‌లో ఆర్ఆర్ఆర్ ని వర్కింగ్ టైటిల్ గా వ్యవహరిస్తున్నారు. ఈ సినిమా టైటిల్ ఇప్ప‌టివ‌ర‌కు ఖ‌రారు కాలేదు.

`ఆర్ఆర్ఆర్‌`కు స‌రిగ్గా స‌రిపోయే ఎబ్రివేష‌న్‌ను పంపించాల్సిందిగా ద‌ర్శ‌కుడు రాజ‌మౌళి గ‌తంలో ప్ర‌క‌టించిన సంగ‌తి తెలిసిందే. దీంతో వివిధ భాష‌ల‌కు చెందిన అభిమానులు `ఆర్ఆర్ఆర్‌`కు స‌రిపోయే విధంగా త‌మ‌కు తోచిన ఎబ్రివేష‌న్‌ల‌ను పంపిస్తున్నారు. `ర‌ఘుప‌తి రాఘ‌వ రాజారాం`, `రాజ్యం ర‌ణం ర‌క్తం`, `రాముడు రుద్రుడు రణ‌రంగం`, `రామ రాజ్య ర‌క్ష‌క‌`.. ఇలా ఇప్ప‌టికే ఎంతో మంది పంపించిన వాటిని `ఆర్ఆర్ఆర్‌` యూనిట్ ట్విట‌ర్ ఖాతాలో పోస్ట్ చేసింది.

`అన్ని భాష‌ల నుంచి `ఆర్ఆర్ఆర్‌`కు సంబంధించిన ఎబ్రివేష‌న్స్ వెల్లువ‌లా వ‌చ్చిప‌డుతున్నాయి. కొన్ని ప‌వ‌ర్‌ఫుల్‌గా ఉన్నాయి. కొన్ని భావ‌యుక్తంగా ఉన్నాయి. కొన్ని ఆలోచింప‌జేసివిగా ఉన్నాయి. ఇంకా పంపించండి. ఎవ‌రికి తెలుసు.. మీరు పంపించేదే `ఆర్ఆర్ఆర్‌` అస‌లు టైటిల్ అవుతుందేమోన‌`ని చిత్ర‌యూనిట్ ట్వీట్ చేసింది.

ఈ సినిమాలో రామ్‌చ‌ర‌ణ్ అల్లూరి సీతారామ‌రాజుగా, ఎన్టీయార్ కొమురం భీమ్‌గా న‌టిస్తున్నారు. చెర్రీ స‌ర‌స‌న హీరోయిన్‌గా బాలీవుడ్ న‌టీమ‌ణి ఆలియా భ‌ట్‌ను తీసుకున్నారు. ఎన్టీయార్ స‌ర‌స‌న హీరోయిన్‌ను ఎంపిక చేయాల్సి ఉంది. అజ‌య్ దేవ‌గ‌ణ్ కీల‌క పాత్ర‌లో క‌నిపించ‌నున్న ఈ చిత్రం చ‌ర‌ణ్ షూటింగ్‌లో గాయ‌ప‌డ‌డం వ‌ల‌న షూటింగ్‌కి కొద్ది రోజులు బ్రేక్ ప‌డింది. మ‌రి కొద్ది రోజుల‌లో చిత్రానికి సంబంధించిన యాక్ష‌న్ షెడ్యూల్‌ని హైద‌రాబాద్‌లోని కోకాపేట‌లో జ‌ర‌ప‌నున్నారు. ఆ త‌ర్వాత పూణేకి ప్రయాణం కట్టనుంది చిత్ర యూనిట్.