‘సాహో’ ఎఫెక్ట్ ..ప్రభాస్ నెక్ట్స్ సినిమాపై?
యంగ్ రెబల్ స్టార్ ప్రభాస్ బాహుబలి తర్వాత చేసిన సినిమా సాహో. సుజిత్ డైరక్షన్ లో వచ్చిన సాహో సినిమా భాక్సాఫీస్ వద్ద పెద్దగా వర్కవుట్ కాలేదు. విజువల్ గా బాగున్నా ఎమోషన్స్ లేని సినిమా అంటూ కామెంట్స్ వచ్చాయి. దాంతో ప్రభాస్ తన తదుపరి చిత్రం విషయంలో చాలా జాగ్రత్తలు తీసుకోవాలి అని ఫిక్స్ అయ్యారు.
ప్రస్తుతం ప్రభాస్ జిల్ ఫేం రాధాకృష్ణ డైరక్షన్ లో సినిమా చేస్తున్నారు. ఆ సినిమాను కూడా యువి క్రియేషన్స్ వారు నిర్మిస్తున్నారు. పిరియాడికల్ మూవీగా వస్తున్న ఈ సినిమా ప్రేమకథ అని తెలుస్తుంది. అందుకే ఈ మూవీకి టైటిల్ గా జాను అని పెట్టబోతున్నారట. జాను అంటే డార్లింగ్ అని అర్ధం. ప్రభాస్ డార్లింగ్ సినిమా మంచి హిట్ అయ్యింది ఆ క్రమంలో జానుకి మంచి క్రేజ్ వచ్చే అవకాశం ఉందని నమ్ముతున్నారు. ప్రభాస్ సరసన ఈ సినిమాలో పూజా హెగ్దె హీరోయిన్ గా నటిస్తోంది. అంతా బాగానే ఉంది కానీ సాహోకు ఏ తప్పు జరిగిందో అది రిపీట్ కాకూడదని ప్రభాస్ భావిస్తున్నారట. అందుకోసం కొంచెం గట్టిగానే డైరక్టర్ కు వార్నింగ్ ఇచ్చిన తరహాలో సూచనలు ఇచ్చారట.
అందుతున్న ఇన్ సైడ్ ఇన్ఫో ప్రకారం ప్రభాస్ ..జాను దర్శకుడుని పిలిచి …స్క్రిప్టుని రీరైట్ చేయమని అన్నారట. ఎమోషన్స్ ని కథలో కలపమని, కేవలం విజువల్ గా బాగుంటే సరిపోదని ఆర్డరేసారట. అలాగే ఎక్కడా బోర్ కొట్టకుండా స్క్రీన్ ప్లే నడవాలని అన్నారట. ఆ రోజు ఓకే చేసిన స్క్రిప్టు సాహో దెబ్బకు పూర్తిగా మారిపోతోందని దర్శకుడు బాధపడినా హీరో ఆదేశించాక చేసేదేముంది. దాంతో ఇప్పుడు జాను దర్శకుడు పూర్తిగా స్క్రిప్టుని రీరైట్ చేయటంలో మునిగితేలుతున్నాడట. ఇదంతా చూస్తూంటే మొత్తానికి ప్రభాస్ పర్ఫెక్ట్ ప్లానింగ్ లోనే ఉన్నాడని చెప్పొచ్చు.