తెలంగాణలో ఇంటర్మీడియట్ విద్యా విధానంలో కీలక మార్పులు తీసుకురావడానికి ఇంటర్ బోర్డు సన్నాహాలు ప్రారంభించింది. ఇప్పటివరకు సైన్స్ గ్రూప్లకు మాత్రమే పరిమితమైన ఇంటర్నల్ మార్కుల వ్యవస్థను ఇప్పుడు ఆర్ట్స్ గ్రూప్లకు, భాషా సబ్జెక్టులకు కూడా విస్తరించాలని ఇంటర్ బోర్డు ప్రతిపాదించింది. మొత్తం 100 మార్కుల్లో 20 మార్కులను ప్రాజెక్ట్లు లేదా అసైన్మెంట్ల రూపంలో విద్యార్థులు సంపాదించాలి. మిగతా 80 మార్కులు రాత పరీక్ష ద్వారా లభిస్తాయి. ఈ ప్రతిపాదనలను ఇంటర్ బోర్డు కార్యదర్శి కృష్ణ ఆదిత్య రాష్ట్ర ప్రభుత్వానికి పంపారు. ప్రభుత్వం ఆమోదం తెలుపితే కొత్త విధానం త్వరలోనే అమలులోకి రానుంది.
ఇప్పటికే 2023–24 విద్యాసంవత్సరం నుంచి ఇంటర్ ఫస్ట్ ఇయర్ ఇంగ్లిష్ సబ్జెక్టులో 20 మార్కుల ప్రాక్టికల్ పరీక్షలు అమల్లోకి వచ్చిన విషయం తెలిసిందే. దీని విజయాన్ని దృష్టిలో ఉంచుకొని వచ్చే విద్యా సంవత్సరం నుంచి సెకండ్ ఇయర్ ఇంగ్లిష్ సబ్జెక్టులో కూడా ఇదే విధానం కొనసాగించనున్నారు. ఇప్పుడు దీన్ని మరింత విస్తరిస్తూ అన్ని భాషా సబ్జెక్టులకు కూడా ఇంటర్నల్ మార్కులు అమలు చేయాలని అధికారులు భావిస్తున్నారు.
ఈ ప్రతిపాదనల ప్రకారం హెచ్ఈసీ, ఎంఈసీ, సీఈసీ వంటి ఆర్ట్స్ గ్రూప్లలోని అన్ని సబ్జెక్టులకు 20 మార్కుల ఇంటర్నల్ కేటాయింపు ఉండనుంది. ఈ మార్పులు అమల్లోకి వస్తే విద్యార్థులు కేవలం రాత పరీక్షలకే పరిమితం కాకుండా ప్రాజెక్టులు, అసైన్మెంట్లు చేయడం ద్వారా సృజనాత్మకత, అన్వయశీలతకు ప్రాధాన్యం లభిస్తుందని ఇంటర్ బోర్డు భావిస్తోంది.
2025–26 విద్యాసంవత్సరం నుంచి ఇంటర్ సిలబస్లో మార్పులు చేయడం పాటు పరీక్షల విధానంలోనూ ఈ కొత్త మార్పులను చేర్చే దిశగా పాఠ్య ప్రణాళిక రివిజన్ కమిటీ నిపుణుల సిఫారసులు కూడా పరిశీలిస్తున్నట్టు సమాచారం. విద్యార్థుల ప్రాజెక్ట్ పనితీరును పాఠశాల స్థాయిలోనే ఆంతరంగా పరీక్షించి, విద్యార్థులకు ప్రతిఫలాన్ని అందించేలా ఈ మార్పులు ఉంటాయని అధికారులు వివరించారు.
రాష్ట్ర ప్రభుత్వం ఆమోదం తెలిపితే ఈ సంవత్సరం నుంచే ఆర్ట్స్, భాషా సబ్జెక్టుల్లో కొత్త ఇంటర్నల్ మార్కుల విధానం అమల్లోకి వచ్చే అవకాశముందని అధికారులు తెలిపారు. విద్యార్థులు ఆచరణాత్మక పద్ధతుల్లో నేర్చుకునే విధంగా ఈ మార్పులు ఉపయోగపడతాయని, దీనితో విద్యా నాణ్యత పెరుగుతుందని ఇంటర్ బోర్డు అంచనా వేస్తోంది.