తెలంగాణ కేబినేట్ విస్తరణ మంగళవారం ఉదయం 11.30 నిమిషాలకు జరగనుంది. అయితే సోమవారం సాయంత్రమే ఎమ్మెల్యే కోటలో ఎమ్మెల్సీ ఎన్నికలకు సంబంధించి నోటిఫికేషన్ విడుదలయ్యింది. దీంతో ఎన్నికల కోడ్ అమలులోకి వచ్చింది. ఎమ్మెల్సీ ఎన్నికల కోడ్ విడుదలయ్యింది కాబట్టి మంత్రి వర్గ విస్తరణ చేయడానికి వీల్లేదని కాంగ్రెస్ నేత రేవంత్ రెడ్డి అన్నారు.
మంత్రి వర్గ విస్తరణ చేయాలంటే కేంద్ర ఎన్నికల సంఘం అనుమతి తప్పనిసరి తీసుకోవాలని లేకుంటే అది ఎన్నికల కోడ్ ఉల్లంఘన కిందికి వస్తుందని రేవంత్ రెడ్డి తెలిపారు. ఎన్నికల సంఘం అనుమతి లేకుండా మంత్రి వర్గ విస్తరణ చేపడితే ఎన్నికల సంఘానికి ఫిర్యాదు చేస్తామని రేవంత్ రెడ్డి హెచ్చరించారు.
రేవంత్ రెడ్డి వ్యాఖ్యలతో అధికార టిఆర్ఎస్ పార్టీ న్యాయ పరమైన ఇబ్బందులు లేకుండా జాగ్రత్త పడుతున్నట్టు తెలుస్తోంది. తెలంగాణలో అసెంబ్లీ ఎన్నికల ఫలితాల తర్వాత నిశ్శబ్దంగా ఉన్న రేవంత్ రెడ్డి ఒక్కసారిగా అధికార పార్టీ పై విమర్శనాస్త్రాలు సంధించడంతో అంతటా చర్చనీయాంశమైంది.