తెలుగుదేశం పార్టీ అనగానే సినీ గ్లామర్ తొనికిసలాడుతుంది. ఆ పార్టీ నిండా సినిమా వాళ్లే కనబడతారు. తెలుగు రాష్ట్రాల్లో టిడిపికి ఉన్న సినీ గ్లామర్ మిగతా ఏ పార్టీకి కూడా లేదనే చెప్పాలి. కాంగ్రెస్, టిఆర్ఎస్, వైసిపి లాంటి పార్టీలకు అంతగా సినిమా వాళ్లు మంచి హోదాల్లో ఉన్న నాయకులు లేరనే చెప్పాలి.
నందమూరి తారక రామారావు అప్పట్లో సినిమాల్లో స్టార్ హీరో గా ఉంటూనే టిడిపి స్థాపించారు. ఆయన లేకపోయినా ఆయన వారసత్వంగా బాలయ్య ఇప్పుడు టిడిపిలో ఉన్నారు. మొన్నటి వరకు హరికృష్ణ కూడా ఉన్నారు. హీరోయిన్ రోజా సుదీర్ఘ కాలం టిడిపిలో పనిచేసి ఇక్కడ పొసగక వైసిపిలోకి వెళ్లారు. ఆమె అక్కడ ఎమ్మెల్యేగా గెలిచారు.
తాజాగా హైదరబాద్ కు చెందిన హీరోయిన్ రేవతి చౌదరి టిడిపి తీర్థం పుచ్చుకున్నారు. టిడిపి అధినేత చంద్రబాబు ఆమెకు పార్టీ కండువా కప్పి టిడిపిలోకి ఆహ్వానించారు. టిడిపి తెలంగాణ శాఖ అధ్యక్షులు ఎల్ రమణ సమక్షంలో రేవతి చౌదరి టిడిపి లో చేరారు. రేవతి చౌదరి 1998లో మిస్ విజయవాడగా ఎంపికయ్యారు.
రేవతి చౌదరి విజయవాడకు చెందిన అమ్మాయి. నాగార్జున యూనివర్శిటీలో చదివారు. ప్రస్తుతం హైదరాబాద్ లో నివాసం ఉంటున్నారు. సినిమాల్లో నటిస్తున్నారు. చిన్న వయసులోనే రాజకీయాల్లోకి అడుగు పెట్టారు రేవతి చౌదరి. ఈసారి ఎన్నికల బరిలో రేవతి చౌదరి ఉంటారా లేదా అన్నది తెలియాల్సి ఉంది.
సీమాంధ్ర సెటిలర్ అయిన రేవతి చౌదరి టిడిపి చాన్స్ ఇస్తే హైదరాబాద్ లో పోటీ చేస్తారన్న ప్రచారం ఉంది. చంద్రబాబు సమక్షంలో పార్టీలో చేరారంటే ప్రాధాన్యత ఉన్నట్లే లెక్క కదా అని టిడిపి శ్రేణులు చెబుతున్నాయి.
రేవతి గురించి మరికొన్ని విషయాలు :
శివాజీ హీరోగా నటించిన సినిమాలో రేవతి తొలిసారి తెరంగేట్రం చేశారు. అయితే ఆ సినిమా అనేక కారణాల వల్ల ఇంకా విడుదల కాలేదు. తారకరత్న నటించిన కాకతీయుడు అనే సినిమాలో కూడా రేవతి నటించారు. అది త్వరలోనే ప్రేక్షకుల ముందుకు రాబోతుందని చెబుతున్నారు.
సముద్ర దర్శకత్వంలో ఒక సినిమాలో నటించినట్లు చెబుతున్నారు. తమిళ సినిమాల్లో కూడా రేవతి నటించినట్లు చెబుతున్నారు. తల్లిదండ్రులు ప్రోత్సాహంతోనే ఆమె సినిమాల్లోకి అడుగు పెట్టినట్లు చెప్పారు.
అయితే మెయిన్ స్ట్రీమ్ సినిమాల్లో ఇప్పటి వరకు రేవతి నటించిన దాఖలాలు కనిపించడంలేదు. తాజాగా రాజకీయాల్లోకి అడుగు పెట్టిన రేవతి ఇక్కడ ఏమేరకు రాణిస్తారో చూడాలి.
రేవతి చౌదరి సినిమాల్లో నటించినప్పటి ఫొటో గ్యాలరీ కింద ఉంది చూడండి.
