ఆయన తెలంగాణలో మొన్నటి వరకు అధికారంలో ఉన్న టిఆర్ఎస్ పార్టీలో యువ లీడర్. ఆయన పాలమూరు జిల్లాకు చెందిన లీడర్. ఆయన బిడ్డ రాయచూర్ లో బి ఫార్మసి చదువుతున్నది. ఆయన ఫ్రెండ్ బిడ్డ కూడా అదే కాలేజీలో బి ఫార్మసీ చదువుతున్నది. ఆయనను మూడు రోజుల కిందట రాయచూర్ పోలీసులు గద్వాలకు వచ్చి అరెస్టు చేసి తీసుకుపోయారు. అక్కడ కోర్టులో హాజరుపరిస్తే జడ్జి రిమాండ్ కు తరలించారు. ఈ సంఘటన ఉమ్మడి పాలమూరు జిల్లాలో కలకలం రేపుతున్నది. ఇక ఫ్రెండ్ బిడ్డపై రేప్ కేసులో ఇరుక్కున ఆ లీడర్ ను కేసు నుంచి బయట పడేసేందుకు కొందరు టిఆర్ఎస్ పెద్ద లీడర్లు యాక్షన్ లోకి దిగినట్లు గుసగుసలు వినబడుతున్నాయి. ఆ ఫ్రెండ్ ఫ్యామిలీకి బెదిరింపులు షురూ అయినట్లు విమర్శలు వినవొస్తున్నాయి. సంఘటనకు సంబంధించి పూర్తి వివరాలు చదవండి.
గద్వాల జిల్లలోని ధరూర్ మండలానికి చెందిన రాఘవేందర్ రెడ్డి అనే యువ పొలిటీషియన్ ఇటీవల కాలంలో టిఆర్ఎస్ పార్టీలో జాయిన్ అయ్యాడు. ఆయన మొన్నటి వరకు కాంగ్రెస్ పార్టీ మండలాధ్యక్షుడిగా ఉన్నాడు. అయితే ఆయన వ్యవహార శైలి బాగాలేకపోవడంతో పదవి నుంచి పక్కన పెట్టినట్లు విమర్శలున్నాయి. దీంతో రాఘవేందర్ రెడ్డి గత నెలరోజుల కిందట కాంగ్రెస్ పార్టీకి గుడ్ బై చెప్పి టిఆర్ఎస్ లో చేరిండు. రాఘవేందర్ రెడ్డి ధరూర్ కు చెందినవాడే అయినా ఆయన నివాసం గద్వాలలో. టిఆర్ఎస్ గద్వాల నియోజకవర్గ అభ్యర్థి కృష్ణమోహన్ రెడ్డి ఆధ్వర్యంలో గులాబీ తీర్థం పుచ్చుకున్నాడు రాఘవేందర్ రెడ్డి.
రాఘవేందర్ రెడ్డి బిడ్డ కర్ణాటక రాష్ట్రంలోని రాయచూర్ నగరంలో ఉన్న నవోదయ వైద్య కళాశాలలో బి ఫార్మసీ చదువుతున్నది. రాఘవేందర్ రెడ్డి స్నేహితుడి బిడ్డ కూడా అదే కాలేజీలో ఫస్ట్ ఇయరే చదువుతున్నది. స్నేహితుడి స్వగ్రామం ఐజ మండలంలోని చినతాండ్రపాడు. ఇద్దరూ తమ బిడ్డలను రాయచూర్ లో బిఫార్మసీలో జాయిన్ చేశారు. దీంతో తరచుగా తన బిడ్డను చూసేందుకు రాఘవేందర్ రెడ్డి రాయచూర్ వెళ్తూ ఉండేవాడు.
అదే సమయంలో తన బిడ్డను చూసేందుకు వెళ్లిన సమయంలో తన స్నేహితుడి బిడ్డను కూడా పలకరించేవాడు. ఇలా వెళ్తూ వెళ్తూ తన స్నేహితుడి బిడ్డపై కన్నేశాడు రాఘవేందర్ రెడ్డి. ఆ అమ్మాయిని లొంగదీసుకునేందుకు ప్రయత్నించాడు. తన సొంత బిడ్డ లేని సమయంలో కాలేజీకి వెళ్లి తన బిడ్డలాంటి అమ్మాయిని బయటకు తీసుకొచ్చి ఈనెల 12వ తేదీన రాయచూర్ లో అత్యాచార యత్నం చేసినట్లు రాఘవేందర్ రెడ్డి మీద ఆరోపణలున్నాయి.
ఈ ఘటన మీద రాయచూర్ నగరంలోని సదర్ బజార్ లో ఉన్న సదర్ బజార్ మహిళా పోలీసు స్టేషన్ లో ఈనెల 13వ తేదీన అంటే మరుసటి రోజున బాధిత అమ్మాయి తల్లిదండ్రులు ఫిర్యాదు చేశారు. బాధితురాలి తల్లిదండ్రుల ఫిర్యాదు మేరకు సదర్ బజార్ పోలీసులు ఫోక్సో చట్టం కింద కేసు నమోదు చేసుకుని దర్యాప్తు చేస్తున్నారు.
అయితే బాధిత కుటుంబం ఫిర్యాదు మేరకు రాయచూర్ పోలీసులు గద్వాల వచ్చి రాఘవేందర్ రెడ్డిని అరెస్టు చేసి రాయచూర్ తరలించారు. నిందితుడిని రాయచూర్ కోర్టులో హాజరుపరచగా రిమాండ్ కు తరలించాలని మెజిస్ట్రేట్ ఆదేశాలు జారీ చేసినట్లు సిఐ హుస్సేన్ తెలిపారు. రాఘవేందర్ రెడ్డిని రిమాండ్ కు తరలించారు.
కేస్ వాపస్ తీసుకోవాలని వత్తిళ్లు :
రాఘవేందర్ రెడ్డి మీద ఫిర్యాదు చేయడంతో పోలీసులు ఫోక్సో చట్టం కింద అరెస్టు చేశారు. దీంతో రాఘవేందర్ రెడ్డిని ఈ కేసు నుంచి బయటపడేసేందుకు గద్వాల జిల్లాకు చెందిన ఇద్దరు పెద్ద లీడర్లు రంగంలోకి దిగినట్లు విశ్వసనీయంగా తెలిసింది. వారిద్దరూ సదరు బాధిత కుటుంబంపై వత్తిడి షురూ చేసినట్లు జిల్లాలో టాక్ నడుస్తోంది. కేసు వాపస్ తీసుకోకపోతే మీ అంతు చూస్తామని వారిని బెదిరింపులకు గురి చేస్తున్నట్లు విమర్శలు వినిపిస్తున్నాయి.
నాలుగు రోజులుగా బాధిత కుటుంబం మీద తీవ్రమైన వత్తిళ్లు చేస్తున్నట్లు తెలుస్తోంది. వాళ్లు మాత్రం తమ బిడ్డ మీద అత్యాచారయత్నం చేసిన రాఘవేందర్ రెడ్డి కి శిక్ష పడేవరకు వదిలే ప్రసక్తే లేదని ఖరాఖండిగా చెబుతున్నారు.
సోషల్ మీడియా సీరియస్ :
రాఘవేందర్ రెడ్డి పుట్టు పూర్వోత్తరాలన్నీ సోషల్ మీడియాలో వైరల్ గా మారాయి. ఆయన రాజకీయాల్లో ఉండి చేసిన నిర్వాకాలను సోషల్ మీడియా బయట పెడుతున్నది. ఆయన ఏ పార్టీ అధికారంలో ఉంటే ఆ పార్టీలో జాయిన్ కావడం అలవాటుగా ఉందని చెబుతున్నారు.
ఈనాడు పత్రికలో రాయచూర్ ఎడిషన్ లో వచ్చిన ఈ సంఘటన తాలూకు న్యూస్ ఐటమ్ కింద పేపర్ క్లిప్పింగ్ ఉంది.
