బీఆర్ఎస్ ఎమ్మెల్యే పాడి కౌశిక్ రెడ్డిని గచ్చిబౌలి పోలీసులు అరెస్టు చేశారు. బంజారాహిల్స్ సీఐ ఫిర్యాదుపై ఆయనను కొండాపూర్‌లోని తన నివాసంలో అదుపులోకి తీసుకోవడం చర్చనీయాంశంగా మారింది. తన విధులకు భంగం కలిగించారన్న ఆరోపణలతో ఈ చర్య తీసుకున్నట్లు పోలీసులు తెలిపారు. కౌశిక్ రెడ్డి అరెస్టు కారణంగా ఆయన నివాసం వద్ద తీవ్ర ఉద్రిక్తత నెలకొంది.
కౌశిక్ రెడ్డిని పరామర్శించడానికి వెళ్లిన పలువురు బీఆర్ఎస్ నాయకులు, మంత్రి హరీష్ రావు, ఎమ్మెల్సీ శంభీపూర్ రాజు తదితరులను పోలీసులు అడ్డుకున్నారు. ఈ సమయంలో పోలీసులకు, బీఆర్ఎస్ నేతలకు మధ్య తీవ్ర వాగ్వాదం చోటుచేసుకుంది. ఉద్ధృతి మరింత పెరగడంతో పోలీసులు నాయకులను అదుపులోకి తీసుకుని గచ్చిబౌలి పోలీస్ స్టేషన్‌కు తరలించారు.
కౌశిక్ రెడ్డి పై ఫిర్యాదు, అరెస్టు నేపథ్యంలో పరిస్థితులు మరింత ఉద్రిక్తంగా మారాయి. బుధవారం తన ఫోన్ ట్యాప్ అవుతోందని కౌశిక్ రెడ్డి ఆరోపిస్తూ బంజారాహిల్స్ పోలీస్ స్టేషన్‌కు వెళ్లారు. అయితే, అక్కడ ఉన్న అధికారుల నిర్లక్ష్యం కారణంగా అనుచరులతో కలసి హంగామా చేశారని తెలుస్తోంది. ఈ వ్యవహారంపై కేసు నమోదు చేసి, ఆతరువాత అరెస్టు చేశారు. ఈ సంఘటనపై బీఆర్ఎస్ నాయకులు తీవ్ర స్థాయిలో ఆగ్రహం వ్యక్తం చేస్తున్నారు. కౌశిక్ రెడ్డిపై జరిగిన ఈ చర్య రాజకీయ కుట్రగా చూస్తున్నామని వారు ఆరోపించారు.