CV Anand: తెలంగాణ రాష్ట్ర నూతన డైరెక్టర్ జనరల్ ఆఫ్ పోలీస్ (DGP)గా సీనియర్ ఐపీఎస్ అధికారి సీవీ ఆనంద్ గురువారం బాధ్యతలు స్వీకరించారు. డీజీపీ కార్యాలయంలో జరిగిన ఈ కార్యక్రమంలో, పదవీ విరమణ చేసిన శివధర్ రెడ్డి నుంచి ఆయన బాధ్యతలను స్వీకరించారు. ఈ సందర్భంగా పోలీసు బలగాల గౌరవ వందనాన్ని స్వీకరించిన అనంతరం, ఆయన మీడియాతో మాట్లాడుతూ తన భవిష్యత్ కార్యాచరణను మరియు ప్రాధాన్యతలను వెల్లడించారు.
తనపై నమ్మకం ఉంచి రాష్ట్ర పోలీస్ బాధ్యతలను అప్పగించిన ముఖ్యమంత్రి రేవంత్ రెడ్డికి మరియు రాష్ట్ర ప్రభుత్వానికి సీవీ ఆనంద్ ప్రత్యేక కృతజ్ఞతలు తెలిపారు. ప్రభుత్వం నిర్దేశించిన లక్ష్యాలకు అనుగుణంగా, శాంతిభద్రతల పరిరక్షణలో రాజీ పడకుండా పనిచేస్తానని ఆయన స్పష్టం చేశారు.
తెలంగాణ పోలీస్ శాఖకు దశాబ్దాల కాలంగా ఉన్న అత్యుత్తమ సంప్రదాయాలను కొనసాగిస్తానని హామీ ఇస్తూనే, మారుతున్న కాలానికి అనుగుణంగా మార్పులు అవసరమని ఆయన అభిప్రాయపడ్డారు.
పోలీస్ యంత్రాంగాన్ని మరింత ఆధునికీకరించి, నేరాల అదుపులో సాంకేతికతను జోడించడం. క్షేత్రస్థాయి పోలీసుల పనితీరును మెరుగుపరచడం. దేశంలో నక్సలిజం అంతిమ దశకు చేరుకున్న తరుణంలో పోలీసుల కార్యాచరణలో మార్పులు రావాలని సీవీ ఆనంద్ పేర్కొన్నారు.
“నక్సలిజాన్ని కట్టడి చేయడంలో తెలుగు రాష్ట్రాలు దేశానికే ఆదర్శంగా నిలిచాయి. కేవలం అణచివేత మాత్రమే కాకుండా, సామాజిక కోణంలో సమస్యను పరిష్కరించడం ముఖ్యం.” అని ఆయన అన్నారు.
లొంగిపోయిన మావోయిస్టులకు మెరుగైన పునరావాసం, ఉపాధి కల్పన వంటి ప్రభుత్వ నిర్ణయాలు సత్ఫలితాలను ఇస్తున్నాయని, ఇదే ఒరవడిని కొనసాగిస్తామని ఆయన వెల్లడించారు.
ప్రజల భద్రతకు అత్యధిక ప్రాధాన్యత ఇస్తామని, తెలంగాణ పోలీసుల ఖ్యాతిని జాతీయ స్థాయిలో మరింత పెంచేందుకు కృషి చేస్తానని సీవీ ఆనంద్ భరోసా ఇచ్చారు. బాధ్యతల స్వీకరణ అనంతరం పలువురు ఉన్నతాధికారులు ఆయనకు శుభాకాంక్షలు తెలిపారు.
