Fire Accident: హైదరాబాద్ నగరంలోని అంబర్పేట్ చౌరస్తాలో ఈరోజు భారీ అగ్నిప్రమాదం సంభవించింది. స్థానిక రెనో (Renault), మహీంద్రా (Mahindra) కార్ల షోరూమ్లలో ఒక్కసారిగా మంటలు చెలరేగడంతో ఆ ప్రాంతమంతా భయాందోళనలు నెలకొన్నాయి. ఈ ప్రమాదంలో భారీగా ఆస్తి నష్టం సంభవించినట్లు తెలుస్తోంది.
అసలు ప్రమాదం ఎలా జరిగిందంటే సోమవారం మధ్యాహ్నం సమయంలో షోరూమ్లో ఒక్కసారిగా మంటలు ఎగిసిపడ్డాయి. ప్రమాదాన్ని గమనించిన షోరూమ్ సిబ్బంది వెంటనే అగ్నిమాపక కేంద్రానికి మరియు పోలీసులకు సమాచారం అందించారు. సమాచారం అందుకున్న వెంటనే అగ్నిమాపక సిబ్బంది పలు ఫైర్ ఇంజన్లతో ఘటనా స్థలానికి చేరుకుని మంటలను అదుపు చేసే ప్రయత్నం చేశారు.
షోరూమ్ వెనుక భాగంలో గృహసముదాయాలు ఉండటంతో, మంటలు వ్యాపించే ప్రమాదం ఉందని భావించిన పోలీసులు ముందు జాగ్రత్త చర్యగా స్థానికులను ఇళ్ల నుండి ఖాళీ చేయించారు. అగ్నిప్రమాదం కారణంగా ఆ ప్రాంతమంతా దట్టమైన పొగ కమ్మేయడంతో స్థానిక ప్రజలు తీవ్ర ఇబ్బందులు పడ్డారు.
ప్రాథమిక విచారణ ప్రకారం, ఈ ప్రమాదానికి షార్ట్ సర్క్యూట్ కారణమని అధికారులు భావిస్తున్నారు. “షోరూమ్లో ఉన్న వాహనాలన్నీ పూర్తిగా మంటలకు ఆహుతయ్యాయి. కోట్లాది రూపాయల ఆస్తి నష్టం వాటిల్లింది,” అని షోరూమ్ యజమానులు ఆవేదన వ్యక్తం చేశారు.
ప్రమాద స్థలాన్ని పరిశీలించిన పోలీసులు కేసు నమోదు చేసుకున్నారు. అగ్నిప్రమాదానికి గల ఖచ్చితమైన కారణాలను తెలుసుకునేందుకు దర్యాప్తు వేగవంతం చేశారు. ప్రస్తుతానికి మంటలు అదుపులోకి వచ్చినప్పటికీ, కూలింగ్ ఆపరేషన్ కొనసాగుతోంది.
