ఆంధ్రప్రదేశ్ రాజకీయాల్లో వైఎస్సార్ కాంగ్రెస్ పార్టీ జాతీయ రాజకీయాల వైపు వేస్తున్న అడుగులు ఇప్పుడు ఆ పార్టీ ఉనికికే ఒక సవాలుగా మారేలా కనిపిస్తున్నాయి. తాడేపల్లి వేదికగా సీపీఐ నేతలతో వైసీపీ జరిపిన చర్చలు, రాబోయే రోజుల్లో ‘ఇండియా’ కూటమికి దగ్గరయ్యేందుకు సాగుతున్న ప్రయత్నాలపై మాజీ ఎంపీ విజయసాయిరెడ్డి చేసిన సంచలన ట్వీట్ రాష్ట్ర రాజకీయాన్నే కాకుండా, దిల్లీ సమీకరణాలను కూడా కదిలించింది. “పార్టీ అధ్యక్షుడి కన్నా ఎత్తైన కుర్చీలో కూర్చున్న సార్ గారు తన మాజీ పార్టీతో జరిపించిన ఈ ఒప్పందం పర్యవసానాలు ఎలా ఉంటాయో వైసీపీ శ్రేణులే ఆలోచించుకోవాలి” అంటూ విజయసాయిరెడ్డి చేసిన హెచ్చరిక వెనుక.. కేవలం పార్టీ అంతర్గత విభేదాలు మాత్రమే లేవని, బీజేపీతో పెట్టుకుంటే వచ్చే ముప్పు గురించిన ముందస్తు సంకేతాలు ఉన్నాయనే విశ్లేషణలు గట్టిగా వినిపిస్తున్నాయి.
వైసీపీ గత ఐదేళ్ల అధికారంలో ఉన్నప్పుడు కానీ, ఆ తర్వాత కానీ కేంద్రంలోని నరేంద్ర మోదీ నేతృత్వంలోని బీజేపీ ప్రభుత్వానికి ఎల్లప్పుడూ బేషరతుగా మద్దతు ఇస్తూ వచ్చింది. పార్లమెంట్లో కీలక బిల్లుల ఆమోదం సమయంలో ఎన్డీయే కూటమికి అవసరమైన మేర అండగా నిలిచింది. కానీ ఇప్పుడు, కూటమి ప్రభుత్వానికి వ్యతిరేకంగా జాతీయ స్థాయిలో పోరాడుతున్న ‘ఇండియా’ కూటమి వైపు వైసీపీ మొగ్గు చూపితే.. అది నేరుగా బీజేపీతో శత్రుత్వాన్ని కొనితెచ్చుకున్నట్లే అవుతుంది. కేంద్రంతో ఉన్న ఈ సున్నితమైన బంధాన్ని తెంచుకుని, నేరుగా మోదీ సర్కార్ను ఢీకొట్టే అంత వ్యూహాత్మక బలం ప్రస్తుతం వైసీపీకి ఉందా..? అనే ప్రశ్నలు తలెత్తుతున్నాయి.
ఒకవేళ వైసీపీ గనుక అధికారికంగా ఇండియా కూటమికి దగ్గరైతే, కేంద్ర ప్రభుత్వ పెద్దల ఆగ్రహానికి గురికాక తప్పదని విశ్లేషకులు హెచ్చరిస్తున్నారు. ఇప్పటికే వైఎస్ జగన్ మోహన్ రెడ్డిపై ఉన్న సిబిఐ, ఈడీ కేసులు ఇంకా కోర్టుల పరిధిలోనే ఉన్నాయి. ఇలాంటి క్లిష్ట సమయంలో కేంద్రంలో అధికారంలో ఉన్న బీజేపీకి వ్యతిరేకంగా విపక్షాల చేతులు కలిపితే.. దిల్లీ నుంచి ఒత్తిడి తీవ్రం కావడంతో పాటు, పెండింగ్ కేసుల దర్యాప్తు వేగవంతం అయ్యే ప్రమాదం ఉంది. విజయసాయిరెడ్డి తన ట్వీట్లో హెచ్చరించినట్లు.. కోటరీ తీసుకుంటున్న ఈ ఏకపక్ష నిర్ణయం వల్ల చివరకు జగన్ మోహన్ రెడ్డి చట్టపరమైన ఇబ్బందుల్లో పడే అవకాశం ఉంది.
ఏపీలో ఇప్పటికే టీడీపీ-జనసేన-బీజేపీ అధికారంలో ఉన్నాయి. ఇప్పుడు జాతీయ స్థాయిలో కూడా వైసీపీ బీజేపీకి శత్రువుగా మారితే.. అది రాష్ట్రంలోని కూటమికి మరింత రాజకీయ బలాన్ని ఇస్తుంది. కేంద్రం నుంచి వచ్చే నిధులు, పారిశ్రామిక మద్దతు పూర్తిగా రాష్ట్ర ప్రభుత్వానికే దక్కుతాయి. పైగా, వైసీపీ వైఖరి పట్ల కేంద్రం కఠినంగా ఉంది అనే సంకేతం క్షేత్రస్థాయికి వెళ్తే.. వైసీపీలో ఉన్న మిగిలిన సీనియర్ నేతలు, కేడర్ కూడా పక్క చూపులు చూసే ప్రమాదం ఉంది. మొత్తానికి, కమ్యూనిస్టుల సాకుతో ఇండియా కూటమికి దగ్గరవ్వాలనే వైసీపీ తాజా వ్యూహం.. సొంత పార్టీలోనే కాకుండా, కేంద్రంతో ఉన్న సంబంధాల పరంగా కూడా ఒక పెద్ద ఆత్మహత్యాసదృశ్య నిర్ణయంగా మారబోతోందా అనేది కాలమే నిర్ణయించాలి.