ఆంధ్రప్రదేశ్ రాజకీయ ముఖచిత్రంలో మరో కొత్త రాజకీయ పార్టీ ఆవిర్భవించింది. వైఎస్సార్ కాంగ్రెస్ పార్టీ, రాజ్యసభ సభ్యత్వానికి రాజీనామా చేసిన తర్వాత కొంతకాలం మౌనంగా ఉన్న మాజీ ఎంపీ వి. విజయసాయిరెడ్డి, బుధవారం విజయవాడలో తన నూతన రాజకీయ పార్టీని అధికారికంగా ప్రకటించారు. విజయవాడలోని ‘ఏ కన్వెన్షన్ సెంటర్’లో నిర్వహించిన భారీ కార్యక్రమంలో తన పార్టీకి ‘పరివర్తన రాజనీతి పార్టీ’ (పీఆర్పీ) అని నామకరణం చేసినట్లు ఆయన వెల్లడించారు. ఈ సందర్భంగా పార్టీ జెండాను, విధివిధానాలను ఆవిష్కరించారు. పైభాగంలో కాషాయం, కింది భాగంలో తెలుపు రంగులతో రూపొందించిన ఈ జెండా మధ్యలో ‘ధర్మచక్రం’ గుర్తును ఏర్పాటు చేశారు.
పార్టీ ఆవిర్భావ సభలో మాట్లాడిన విజయసాయిరెడ్డి, రాష్ట్రంలోని ప్రధాన రాజకీయ పార్టీలు మరియు నేతల తీరుపై తన అభిప్రాయాలను వ్యక్తం చేశారు. మంచి పని చేస్తే ఎవరైనా అభినందించాల్సిందేనని, అదే సమయంలో తప్పు ఎవరు చేసినా ఆధారాలతో ప్రశ్నించాల్సిన బాధ్యత ప్రజలపై ఉందని ఆయన అన్నారు. కేవలం రెండు పార్టీలు, రెండు కుటుంబాలే ఆంధ్రప్రదేశ్‌ను పరిపాలించాలా? సీఎం కొడుకు మాత్రమే సీఎం కావాలా? అని ఆయన ప్రశ్నించారు. తనకు ముఖ్యమంత్రి కావాలనే ఆశ లేదని స్పష్టం చేసిన ఆయన, వారసత్వ రాజకీయాలకు ముగింపు పలుకుతూ, శక్తిసామర్థ్యాలు కలిగిన సామాన్య యువత నుంచే నాయకులను వెలికితీసి ముఖ్యమంత్రిని చేస్తానని ప్రకటించారు.
గత ఎన్నికల ఫలితాలను ప్రస్తావిస్తూ… 2019లో వైసీపీకి 151 సీట్లు ఇచ్చిన ప్రజలే, 2024లో కేవలం 11 సీట్లకు ఎందుకు పరిమితం చేశారో ఆలోచించుకోవాలని విజయసాయిరెడ్డి వ్యాఖ్యానించారు. నాయకుడికి, ప్రజలకు మధ్య గోడలు కట్టుకుంటూ పోతే ప్రజలు ఇలాగే తీర్పు ఇస్తారని ఆయన పేర్కొన్నారు. మరోవైపు, 2024 ఎన్నికల్లో ప్రజలు కూటమికి పట్టం కట్టినప్పటికీ, అధికారంలోకి వచ్చాక ఎన్నికల హామీలు మాయమయ్యాయని ఆయన విమర్శించారు. దేశభక్తి, ప్రజా సంక్షేమం మరియు రాష్ట్ర ప్రయోజనాల పరిరక్షణే తమ పార్టీ ప్రధాన సిద్ధాంతాలని తెలిపిన విజయసాయిరెడ్డి, రాబోయే 2029 ఎన్నికల్లో తమ పార్టీ రాష్ట్రంలో మూడో ప్రత్యామ్నాయంగా ఎదిగి అధికారంలోకి వస్తుందని ధీమా వ్యక్తం చేశారు.