ఆంధ్రప్రదేశ్ రాజకీయాల్లో వైఎస్సార్ కాంగ్రెస్ పార్టీకి పార్లమెంట్ వేదికగా గట్టి ఎదురుదెబ్బ తగలనుందా అనే చర్చ ప్రస్తుతం జోరుగా సాగుతోంది. ఒకవైపు మాజీ మంత్రి వైఎస్ వివేకానంద రెడ్డి హత్య కేసులో కడప ఎంపీ వైఎస్ అవినాష్ రెడ్డి చుట్టూ ఎన్‌ఫోర్స్‌మెంట్ డైరెక్టరేట్ ఉచ్చు బిగిస్తుండగా.. ఇప్పుడు తాజాగా రాజంపేట ఎంపీ పి.వి. మిథున్ రెడ్డి కూడా కేంద్ర దర్యాప్తు సంస్థల నిఘా నీడలోకి రావడం రాష్ట్రవ్యాప్తంగా తీవ్ర సంచలనంగా మారింది. రూ.40 కోట్ల మనీలాండరింగ్ ఆరోపణల నుండి చిరుద్యోగుల జీతాల దోపిడీ స్కామ్ వరకు వరుసగా లీకులు వస్తుండటంతో.. వైసీపీకి చెందిన ఇద్దరు కీలక సిట్టింగ్ ఎంపీలు ఒకేసారి లీగల్ చిక్కుల్లో పడటం తాడేపల్లి వర్గాల్లో తీవ్ర కలవరాన్ని రేపుతోంది.
వివేకానంద రెడ్డి హత్యకు సంబంధించి జరిగినట్లు చెప్తున్న రూ.40 కోట్ల భారీ సుపారీ ఒప్పందం మరియు ఆర్థిక లావాదేవీలపై ఈడీ అధికారులు అస్సలు తగ్గడం లేదు. ఇప్పటికే ఈ కేసులోని కీలక నిందితులైన దస్తగిరి, ఎర్రగంగిరెడ్డి, సునీల్ యాదవ్, ఉమాశంకర్ రెడ్డిలను సుదీర్ఘంగా ప్రశ్నించి వారి స్టేట్‌మెంట్లను రికార్డ్ చేసిన ఈడీ.. తాజాగా కడప ఎంపీ వైఎస్ అవినాష్ రెడ్డికి నోటీసులు జారీ చేసింది. ఈ నెల 14వ తేదీన తమ ఎదుట వ్యక్తిగతంగా విచారణకు హాజరుకావాలని సమన్లలో ఆదేశించడంతో అవినాష్ రెడ్డి రాజకీయ భవిష్యత్తుపై ఉత్కంఠ నెలకొంది.
ఢిల్లీ స్థాయిలో ఈ కేసును మేనేజ్ చేసే బలమైన రక్షణ కవచం ప్రస్తుతానికి వైసీపీకి లేకపోవడంతో.. అక్టోబర్ 14న ఏం జరగబోతోందనే భయం పార్టీ కేడర్‌ను వేధిస్తోంది. మరోవైపు రాజంపేట ఎంపీ మిథున్ రెడ్డి కూడా మద్యం స్కామ్, చిరుద్యోగుల జీతాల నిధుల మళ్ళింపు ఆరోపణల్లో తీవ్ర ఇబ్బందులు ఎదుర్కొంటున్నారు. గత ప్రభుత్వ హయాంలో మద్యం దుకాణాల్లో పనిచేసే దాదాపు 11 వేల మంది సిబ్బంది అకౌంట్ల నుండి నెలకు రూ.8 వేల చొప్పున ఐదేళ్ల కాలంలో ఏకంగా రూ.400 కోట్ల ప్రభుత్వ సొమ్మును స్వాహా చేశారనే ఉదంతంపై సిట్ తో పాటు కేంద్ర సంస్థలు ఆరా తీస్తున్నాయి.
ఈ దోపిడీ సొమ్ములో సింహభాగం మిథున్ రెడ్డి బినామీ అకౌంట్లలోకి వెళ్లాయనే ఆరోపణలు వస్తుండటంతో, దీనిపై కూడా మనీలాండరింగ్ చట్టాల కింద ఈడీ విచారణకు రంగం సిద్ధమవుతున్నట్లు తెలుస్తోంది. ఇద్దరు ఎంపీలు ఒకేసారి కేంద్ర సంస్థల టార్గెట్‌గా మారడంతో.. రాబోయే రోజుల్లో వైఎస్సార్సీపీకి పార్లమెంట్ పరిధిలో గడ్డుకాలం తప్పదనే విశ్లేషణలు వినిపిస్తున్నాయి.