ఆంధ్రప్రదేశ్ రాజకీయాల్లో ఒక ఆసక్తికరమైన, అత్యంత కీలక పరిణామం చోటుచేసుకుంది. రాష్ట్ర డిప్యూటీ సీఎం, జనసేన అధినేత పవన్ కల్యాణ్ గురువారం ఉండవల్లిలోని ముఖ్యమంత్రి చంద్రబాబు నాయుడు నివాసానికి వెళ్లారు. అయితే, ఎప్పుడూ ఉండే అధికారిక హడావుడి, సెక్యూరిటీ ప్రోటోకాల్స్, భారీ కాన్వాయ్ ఏమీ లేకుండా.. పవన్ కల్యాణ్ అత్యంత సాదాసీదాగా, ఒంటరిగా సీఎం నివాసానికి చేరుకోవడం అందరినీ ఆశ్చర్యపరిచింది. ప్రస్తుత రాజకీయ పరిస్థితుల నేపథ్యంలో వీరిద్దరి అత్యవసర భేటీ రాష్ట్రవ్యాప్తంగా తీవ్ర చర్చనీయాంశంగా మారింది.
ముఖ్యమంత్రి చంద్రబాబు నాయుడు, డిప్యూటీ సీఎం పవన్ కల్యాణ్ మధ్య ఏపీ స్థానిక సంస్థల ఎన్నికలపై సుదీర్ఘంగా కీలక చర్చలు జరిగాయి. రాష్ట్రంలో ప్రస్తుతం జరుగుతున్న మున్సిపల్ కార్పొరేషన్, మున్సిపాలిటీ ఎన్నికలతో పాటు ఎంపీటీసీ, జెడ్పీటీసీ ఎన్నికల సరళిపై ఇరు నేతలు సమీక్షించారు. ముఖ్యంగా, నామినేషన్ల ఉద్రిక్తతలపై సుప్రీంకోర్టు ఇచ్చిన తాజా ఆదేశాల నేపథ్యంలో.. కొన్ని పట్టణ స్థానిక సంస్థల్లో ఎన్నికల ప్రక్రియ తాత్కాలికంగా వాయిదా పడటం, అభ్యర్థుల తుది జాబితాను హోల్డ్‌లో పెట్టడం వంటి అంశాలపై ప్రధానంగా చర్చించారు.
కోర్టు ఉత్తర్వుల తదుపరి పరిణామాలు, లీగల్ అడుగులపై ఇద్దరు అగ్రనేతలు ఒక అవగాహనకు వచ్చినట్లు తెలుస్తోంది. రాష్ట్రంలో నామినేషన్ల పర్వం ముగిసి గుర్తుల కేటాయింపు, ప్రచార ఘట్టం ఊపందుకుంటున్న తరుణంలో.. కూటమి భాగస్వామ్య పక్షాల మధ్య క్షేత్రస్థాయి సమన్వయంపై ఈ భేటీలో మాట్లాడినట్లు సమాచారం. గుంటూరు, నెల్లూరు వంటి పలు చోట్ల సీట్ల సర్దుబాటు తర్వాత తలెత్తిన చిన్నపాటి అసంతృప్తులను చక్కదిద్దడం, రెబల్స్ సమస్యను పరిష్కరించడంపై ఇరు నేతలు ఒక స్పష్టమైన వ్యూహాన్ని ఖరారు చేసుకున్నారు. టీడీపీ, జనసేన, బీజేపీ శ్రేణులు క్షేత్రస్థాయిలో సమిష్టిగా పనిచేసి స్థానిక పోరులో క్లీన్ స్వీప్ చేయడమే లక్ష్యంగా ప్రచార బరిలోకి వెళ్లాలని ఇరు నేతలు నిర్ణయించారు.