ఆంధ్రప్రదేశ్‌లో స్థానిక సంస్థల ఎన్నికల్లో బీసీలకు 34 శాతం రిజర్వేషన్లు కల్పిస్తూ కూటమి ప్రభుత్వం జారీ చేసిన జీవోలను ఏపీ హైకోర్టు కొట్టేయడం వెనుక పెద్ద రాజకీయ వ్యూహం ఉందా..? చట్టపరంగా ఈ రిజర్వేషన్లు కోర్టులో నిలబడవని ముందే తెలిసినప్పటికీ, కేవలం బీసీ ఓటర్లను మభ్యపెట్టడానికే ప్రభుత్వం ఈ మైండ్ గేమ్ ఆడిందా..? అనే సంచలన విమర్శలు ఇప్పుడు ఏపీ రాజకీయాల్లో మొదలయ్యాయి.
పొరుగు రాష్ట్రమైన తెలంగాణలో కూడా ఇదే తరహాలో స్థానిక పోరులో బీసీలకు 34 శాతం రిజర్వేషన్లు ఇవ్వాలని డిమాండ్లు వచ్చినా.. అక్కడి కాంగ్రెస్ ప్రభుత్వం సుప్రీంకోర్టు 50 శాతం నిబంధనల ప్రకారం అది సాధ్యం కాదని తేల్చేసింది. కానీ, ఏపీలో మాత్రం చంద్రబాబు సర్కార్ అంతా తెలిసి కూడా జీవోలు ఇచ్చి.. ఇప్పుడు కోర్టు ద్వారా రద్దు చేయించుకునేలా వ్యవహరించిందనే టాక్ వినిపిస్తోంది. నిజానికి, సుప్రీంకోర్టు గతంలో ఇచ్చిన ప్రసిద్ధ కృష్ణమూర్తి కేసు తీర్పు ప్రకారం.. స్థానిక సంస్థల ఎన్నికల్లో ఎస్సీ, ఎస్టీ, బీసీల మొత్తం రిజర్వేషన్లు 50 శాతం లోపు (ప్రత్యేక పరిస్థితుల్లో 59 శాతం) మాత్రమే ఉండాలి.
ఈ నిబంధనల ప్రకారమే తెలంగాణ ప్రభుత్వం స్థానిక ఎన్నికలకు వెళ్తోంది. ఈ విషయాలన్నీ ఏపీ న్యాయ నిపుణులకు, ప్రభుత్వ పెద్దలకు పూర్తిగా తెలుసు. అయినా సరే, బీసీల పట్ల తమకు అమితమైన ప్రేమ ఉందనే కలరింగ్ ఇవ్వడం కోసం 34 శాతం రిజర్వేషన్ల జీవోలను తెరపైకి తెచ్చారు. తీరా ఇప్పుడు కోర్టు ఆ జీవోలను రద్దు చేయడంతో.. “మేము ఇవ్వాలని చూశాం, కానీ కోర్టు అడ్డుకుంది” అని తప్పును న్యాయస్థానం మీదకు నెట్టేసి రాజకీయ లబ్ధి పొందడానికే ఈ వ్యూహం పన్నారనే విమర్శలు వ్యక్తమవుతున్నాయి.
హైకోర్టు తీర్పు తర్వాత ఇప్పుడు కూటమి ప్రభుత్వం ముందు రెండు స్పష్టమైన మార్గాలు ఉన్నాయి. ఒకటి.. నిజంగానే బీసీలకు 34 శాతం కోటా ఇవ్వాలనే పట్టుదల ఉంటే, హైకోర్టు తీర్పును సవాలు చేస్తూ సుప్రీంకోర్టులో అప్పీల్ దాఖలు చేయడం. అయితే, సుప్రీంకోర్టులో కూడా దీనికి సానుకూలత వచ్చే అవకాశాలు చాలా తక్కువని న్యాయ నిపుణులు చెప్తున్నారు. పైగా సుప్రీంకోర్టుకు వెళ్తే స్థానిక ఎన్నికల ప్రక్రియ మరింత ఆలస్యమవుతుంది. రెండవ మార్గం.. హైకోర్టు ఇచ్చిన తీర్పు ప్రకారం మొత్తం రిజర్వేషన్లను 59 శాతానికి లోబడి సవరిస్తూ కొత్త ఉత్తర్వులు ఇవ్వడం. అంటే, బీసీల రిజర్వేషన్లను 34 శాతం నుండి దాదాపు 24 శాతానికి తగ్గించి, ఆ లెక్కల ప్రకారమే స్థానిక సంస్థల ఎన్నికలకు వెళ్లడం.
ప్రభుత్వం ఒకవేళ సుప్రీంకోర్టుకు వెళ్లకుండా, హైకోర్టు ఆదేశాల ప్రకారం రిజర్వేషన్లు తగ్గించి ఎన్నికలకు వెళ్తే.. క్షేత్రస్థాయిలో బీసీ సామాజిక వర్గాల నుండి తీవ్ర వ్యతిరేకత వచ్చే ప్రమాదం ఉంది. ఇచ్చిన హామీని నిలబెట్టుకోలేకపోయారనే అపవాదు కూటమి ప్రభుత్వంపై పడుతుంది. దీన్ని ప్రతిపక్ష వైఎస్‌ఆర్‌సీపీ అస్త్రంగా మార్చుకునే అవకాశం ఉంది. ఒకవేళ సుప్రీంకోర్టుకు వెళ్తే ఎన్నికలు వాయిదా పడతాయి. ఏదేమైనా, అంతా తెలిసి చేసిన ఈ రిజర్వేషన్ల ప్రయోగం ఇప్పుడు చంద్రబాబు ప్రభుత్వానికి ఇటు సుప్రీంకోర్టు సవాల్‌గా, అటు క్షేత్రస్థాయిలో రాజకీయ సంక్షోభంగా మారేలా కనిపిస్తోంది.