ఆంధ్రప్రదేశ్ రాజకీయ చరిత్రలోనే అత్యంత హేయమైన, సంచలనాత్మకమైన వైఎస్ వివేకానందరెడ్డి సొంత బాబాయ్ హత్య కేసు ఇప్పుడు వైఎస్సార్ కాంగ్రెస్ పార్టీని నిలువునా ముంచేసేలా మారుతోందా..? అంటే అవుననే సమాధానం వినపడుతోంది. ఇన్నాళ్లూ ఈ కేసును కడప ఎంపీ వైఎస్ అవినాష్ రెడ్డి, ఆయన తండ్రి భాస్కర్ రెడ్డిల చుట్టూనే తిప్పిన దర్యాప్తు సంస్థలకు, ఇప్పుడు ఈ కేసులో రెండో నిందితుడు సునీల్ యాదవ్ ఇచ్చిన తాజా స్టేట్మెంట్ ఏకంగా వైకాపా టాప్ లీడర్షిప్కే డెడ్ ఎండ్ చూపించేలా ఉంది.
నేరుగా మాజీ సీఎం వైఎస్ జగన్ మోహన్ రెడ్డి, ఆయన సతీమణి వైఎస్ భారతిల పేర్లను సునీల్ యాదవ్ బహిరంగంగా ప్రస్తావించడంతో వైకాపా డిఫెన్స్లో పడిపోయింది అంటున్నారు అనలిస్ట్ లు. సునీల్ యాదవ్ లేవనెత్తిన పాయింట్ ఇప్పుడు వైకాపా శ్రేణులను ఉక్కిరిబిక్కిరి చేస్తోంది. ‘ఈ హత్య వల్ల లాభపడింది జగన్, భారతి, అవినాష్ రెడ్డి మాత్రమే’ అని ఏ2 నిందితుడే స్వయంగా ఒప్పుకోవడం వెనుక పెద్ద పొలిటికల్ స్క్రీన్ ప్లే ఉందనేది స్పష్టమవుతోంది. గత ఐదేళ్లూ అధికారంలో ఉన్నప్పుడు దర్యాప్తును నీరుగార్చేందుకు, సీబీఐ అధికారులపైనే ఎదురు కేసులు పెట్టేందుకు నాటి వైసీపీ ప్రభుత్వం ఎందుకు తాపత్రయపడిందో ఇప్పుడు సామాన్య ప్రజలకు కూడా అర్థమవుతోందనే మాట వినపడుతోంది.
వివేకా బతికుంటే కడప ఎంపీ సీటు అవినాష్ రెడ్డికి దక్కేది కాదని, రాజకీయంగా తమకు అడ్డు వస్తున్నారనే ఒకే ఒక్క కారణంతో సొంత బాబాయ్ను అంతమొందించేందుకు వెనుకాడలేదనే ఆరోపణలకు ఈ తాజా పరిణామాలు మరింత బలాన్ని చేకూరుస్తున్నాయి. జగన్, భారతి, అవినాష్ రెడ్డిల వల్ల తన ప్రాణాలకు ముప్పు ఉందంటూ ఏ2 సునీల్ యాదవ్ రాష్ట్ర డీజీపీని, కోర్టును ఆశ్రయించడం వైకాపాకు పెద్ద నైతిక ఓటమి అంటూ కూటమి సెటైర్లు వేస్తోంది. సాక్ష్యాలను రూపుమాపడంలో, లేదా నిందితులను నోరు విప్పకుండా చేయడంలో వైకాపా బ్యాచ్ ఎంతటి అరాచకానికైనా తెగబడుతుందనే ప్రచారానికి ఇది అద్దం పడుతోందని మండిపడుతోంది.
గతంలో ఇదే కేసులో అనుమానాస్పదంగా చనిపోయిన శంకరయ్య, అలాగే ఇతర సాక్షుల ఉదంతాలను గుర్తు చేసుకుంటున్న ప్రజలు.. ఇప్పుడు సునీల్ యాదవ్ ప్రాణభయాన్ని నిజమేనని నమ్ముతున్నారనే విమర్శలు సైతం వినపడుతున్నాయి. మరోవైపు ఈ కేసులో కోట్ల రూపాయల నిధుల మళ్లింపుపై ఈడీ ఎంట్రీ ఇచ్చి, ఎర్ర గంగిరెడ్డిని గంటల తరబడి విచారించడం చూస్తుంటే.. ఈ హత్య వెనుక ఉన్న అసలు సూత్రధారులు, పాత్రధారులు త్వరలోనే జైలు ఊచలు లెక్కపెట్టడం ఖాయంగా కనిపిస్తోంది.