విజయనగరం జిల్లా రాజకీయాల్లో వైఎస్సార్ కాంగ్రెస్ పార్టీకి అత్యంత కీలకమైన పట్టున్న మాజీ జిల్లా పరిషత్ చైర్మన్ మజ్జి శ్రీనివాసరావు గతేడాది సెప్టెంబర్‌లో ముఖ్యమంత్రి చంద్రబాబు నాయుడు సమక్షంలో తెలుగుదేశం పార్టీలో చేరిన సంగతి తెలిసిందే. అయితే, ఆయన రాకతో జిల్లా టీడీపీలో భారీ మైలేజ్ వస్తుందని అధిష్టానం ఆశించినప్పటికీ, క్షేత్రస్థాయి సమీకరణాలు మాత్రం పూర్తి భిన్నంగా మారాయి. చిన్న శ్రీను వంటి బలమైన నేత పార్టీలోకి వచ్చినా.. జిల్లాలో టీడీపీకి ఆశించిన స్థాయిలో ఎలాంటి రాజకీయ ప్రయోజనం కలగలేదనే చర్చ ఇప్పుడు విజయనగరం జిల్లా వ్యాప్తంగా జోరుగా సాగుతోంది.
ఈ అంతర్గత విభేదాలు, సమన్వయ లోపం ఇటీవల ముగిసిన స్థానిక సంస్థల ఎన్నికల ఫలితాలపై అత్యంత తీవ్రమైన ప్రభావాన్ని చూపించాయి. దీనికి ప్రధాన కారణం.. దశాబ్దాలుగా జిల్లాలో ముఖాముఖి తలపడిన పాత శత్రుత్వాలే. ముఖ్యంగా చీపురుపల్లి నియోజకవర్గంలో జిల్లా టీడీపీ అధ్యక్షుడు కిమిడి వర్గానికి, చిన్న శ్రీనుకు మధ్య దశాబ్దాల కాలంగా తీవ్రమైన రాజకీయ వైరం ఉంది. గతంలో ప్రత్యర్థులుగా ఉండి, ఒకరిపై ఒకరు తీవ్ర ఆరోపణలు చేసుకున్న నేతలు.. కేవలం రాజకీయ అవసరాల కోసం రాత్రికి రాత్రే ఒకే గూటికి చేరడాన్ని అటు స్థానిక లీడర్లు గానీ, ఇటు టీడీపీ క్యాడర్ గానీ జీర్ణించుకోలేకపోయారు.
చిన్న శ్రీనును పార్టీలోకి కలుపుకోవడానికి స్థానిక నియోజకవర్గ ఇన్‌ఛార్జ్‌లు, ఎమ్మెల్యేలు సైతం విముఖత చూపడం, ఆయనను కేవలం నామమాత్రపు నేతగానే పరిగణించడంతో ఆయన మార్క్ నెట్‌వర్క్ ఎక్కడా టీడీపీకి ఉపయోగపడలేదు. ఈ అసంతృప్తి స్థానిక సంస్థల ఎన్నికల్లో కూటమి కొంపముంచింది. టిక్కెట్ల కేటాయింపు సమయం నుంచే చిన్న శ్రీను అనుచరులకు, పాత టీడీపీ శ్రేణులకు మధ్య తీవ్రమైన ఆధిపత్య పోరు నడిచింది. పార్టీ కోసం ఎప్పటి నుంచో కష్టపడిన తమను కాదని, నిన్నమొన్నటి వరకు వైసీపీలో ఉండి దాడులకు దిగిన వారికి ప్రాధాన్యత ఇవ్వడంపై పాత తమ్ముళ్లు తీవ్ర అసంతృప్తితో ప్రచారానికి దూరంగా ఉండిపోయారు.
ఫలితంగా, చీపురుపల్లి పరిధిలోని గరివిడి, గుర్ల వంటి కీలకమైన మండలాల్లో వైసీపీ తన పట్టును నిలబెట్టుకుని మెజారిటీ స్థానాలను దక్కించుకుంది. చిన్న శ్రీను కూతురు సిరి సహస్ర నామినేషన్‌పై కోర్టు వివాదాలు, స్థానిక వివాదాలు కూటమి ఇమేజ్‌ను మరింత దెబ్బతీశాయి. పెద్ద ఆశలతో తెచ్చుకున్న ‘చిన్న శ్రీను’ ఎంట్రీ, సరైన సమన్వయం లేకపోవడం వల్ల విజయనగరం జిల్లాలో ప్లస్ అవ్వాల్సింది పోయి కూటమికి పెద్ద మైనస్‌గా మారిందనేది జగమెరిగిన సత్యం.