ఆంధ్రప్రదేశ్ రాజకీయాల్లో గత కొన్నేళ్లుగా ప్రభుత్వ ఉద్యోగుల చుట్టూనే రాజకీయం తిరుగుతోంది. మునుపెన్నడూ లేని విధంగా ప్రస్తుతం రాష్ట్రంలోని ఉద్యోగ సమాజం, ముఖ్యంగా గ్రామ/వార్డు సచివాలయ ఉద్యోగులు, ప్రభుత్వ ఉపాధ్యాయులు.. “జగన్ అనుకూల ఉద్యోగులు”, “చంద్రబాబు అనుకూల ఉద్యోగులు”గా విడిపోయారనే చర్చ రాజకీయ వర్గాల్లో తీవ్రంగా నడుస్తోంది. ఈ విభజన కేవలం ఆరోపణలకే పరిమితమా..? లేక క్షేత్రస్థాయిలో నిజంగానే పొలిటికల్ వర్కవుట్ అవుతుందా..? అనే దానిపై ఇప్పుడు ఆసక్తికరమైన విశ్లేషణలు సాగుతున్నాయి.
వైఎస్సార్ కాంగ్రెస్ పార్టీ హయాంలో ఏకంగా లక్షా 40 వేల మందికి పైగా సచివాలయ ఉద్యోగాలను ఒకేసారి భర్తీ చేయడం జరిగింది. నాటి సీఎం వైఎస్ జగన్ మోహన్ రెడ్డి ఈ వ్యవస్థను తన ప్రతిష్టాత్మక మైలురాయిగా భావించారు. అయితే, కూటమి ప్రభుత్వం అధికారంలోకి వచ్చిన తర్వాత, ఈ సచివాలయ సిబ్బందిపై వాలంటీర్ల బాధ్యతలను కూడా మోపడంతో పనిభారం విపరీతంగా పెరిగిపోయిందనే ఆందోళనలు వ్యక్తమవుతున్నాయి.
ఇటీవల విజయవాడలో తమ సర్వీస్ రూల్స్, ప్రమోషన్ల కోసం సచివాలయ ఉద్యోగులు నిర్వహించిన నిరసనలపై జరిగిన లాఠీఛార్జ్, సస్పెన్షన్ల పరిణామాలు ఉద్రిక్తతకు దారితీశాయి. ఈ నిరసనల వెనుక జగన్ మోహన్ రెడ్డి కుట్ర ఉందని తెలుగుదేశం పార్టీ ఆరోపిస్తుండగా, ఉద్యోగులపై మోయలేని భారం వేసి వేధిస్తున్నారంటూ వైఎస్ జగన్ మద్దతుగా నిలిచారు. దీనివల్ల సచివాలయ సిబ్బందిలో ఎక్కువ శాతం మంది గత ప్రభుత్వం వైపే మొగ్గు చూపుతున్నారనే ముద్ర బలంగా పడింది.
మరోవైపు ప్రభుత్వ ఉపాధ్యాయులు గత జగన్ ప్రభుత్వ హయాంలో యాప్ బేస్డ్ అటెండెన్స్, ఫేస్ రికగ్నిషన్, నాన్-టీచింగ్ పనులు అంటే అమ్మ ఒడి వెరిఫికేషన్, నాడు-నేడు పర్యవేక్షణ వంటి వాటితో తీవ్ర అసంతృప్తికి గురయ్యారు. ఆ కోపం ఎన్నికల్లో కూటమి విజయానికి ఒక కారణంగా నిలిచింది. అధికారంలోకి రాగానే సీఎం చంద్రబాబు నాయుడు మెగా డీఎస్సీ ఫైల్పై తొలి సంతకం చేసి నిరుద్యోగులను, ఉపాధ్యాయ వర్గాలను ఆకట్టుకునే ప్రయత్నం చేశారు. అయితే, ఆ తర్వాత ఉపాధ్యాయ నియామకాల్లో అవకతవకలు జరిగాయంటూ వైఎస్ జగన్ సీన్ లోకి రావడం, దానికి విద్యాశాఖ మంత్రి నారా లోకేష్ కౌంటర్ ఇవ్వడంతో టీచర్ల రాజకీయం మరింత వేడెక్కింది.
నిజానికి ఏ ప్రభుత్వానికైనా ఉద్యోగులు వ్యవస్థకు వెన్నెముక లాంటివారు. వారిని పార్టీల వారీగా విభజించి చూడటం తాత్కాలికంగా రాజకీయ ప్రయోజనం చేకూర్చవచ్చు కానీ, దీర్ఘకాలంలో అది పరిపాలనకు పెద్ద అవరోధంగా మారుతుంది. సచివాలయ ఉద్యోగులకు పెరిగిన పనిభారాన్ని, ఐఆర్, పీఆర్సీ పెండింగ్ అంశాలను అస్త్రాలుగా చేసుకుని ఉద్యోగులను కూటమి ప్రభుత్వానికి వ్యతిరేకంగా మార్చాలని వైఎస్ జగన్ చూస్తున్నారు.
గత ప్రభుత్వంలో జరిగిన ఇబ్బందులను గుర్తు చేస్తూనే, మెగా డీఎస్సీ వంటి నిర్ణయాలతో టీచర్లు మరియు కొత్తగా వచ్చే ఉద్యోగులను తమ వైపు తిప్పుకోవాలని చంద్రబాబు వ్యూహాలు రచిస్తున్నారు. చివరికి, ఉద్యోగులు ఏ ఒక్క పార్టీకో శాశ్వత ఓటు బ్యాంక్గా మారిపోరు. ఏ ప్రభుత్వం తమకు డీఏ బకాయిలు సకాలంలో ఇస్తుంది, పీఆర్సి మెరుగ్గా అమలు చేస్తుంది, పనిభారాన్ని తగ్గిస్తుందనే ఆర్థిక, సర్వీస్ ప్రయోజనాల ఆధారంగానే వారి మొగ్గు ఉంటుంది. కాబట్టి, కేవలం “జగన్ ఉద్యోగులు”, “బాబు ఉద్యోగులు” అనే ముద్రలతో మాత్రమే రాజకీయం పూర్తిగా వర్కవుట్ అవ్వడం కష్టమని, ఉద్యోగుల అసలు సమస్యలను ఎవరు పరిష్కరిస్తారనే దానిపైనే వారి మద్దతు ఆధారపడి ఉంటుందని విశ్లేషకులు భావిస్తున్నారు.