ఆంధ్రప్రదేశ్ స్థానిక సంస్థల ఎన్నికల్లో శ్రీసత్యసాయి జిల్లా వ్యాప్తంగా ఎన్డీయే కూటమి మెజారిటీ సాధించినప్పటికీ, కదిరి నియోజకవర్గంలో మాత్రం ఫలితాలు పూర్తిగా రివర్స్ అయ్యాయి. కదిరి, పుట్టపర్తి పరిధిలోని 12 జడ్పీటీసీ స్థానాలకు గాను వైసీపీ 7 చోట్ల విజయం సాధించి కూటమికి ఊహించని షాక్ ఇవ్వగా, టీడీపీ 5 స్థానాలకే పరిమితమైంది. అయితే చిత్రంగా గ్రామ స్థాయి ఎంపీటీసీ స్థానాల్లో మాత్రం కూటమి తన పట్టును నిరూపించుకుంది. రెండు నియోజకవర్గాల పరిధిలోని మొత్తం 125 ఎంపీటీసీ సీట్లలో టీడీపీ ఏకంగా 76 స్థానాలు గెలుచుకోగా, వైసీపీ 49 స్థానాలకే పరిమితమైంది.
పల్లెల్లో ఎంపీటీసీల పరంగా తమ్ముళ్ల హవా స్పష్టంగా కనిపించినప్పటికీ, జడ్పీటీసీ స్థానాలకొచ్చేసరికి ఓటర్లు ‘క్రాస్ ఓటింగ్’ కు మొగ్గు చూపడం కూటమి నాయకత్వాన్ని తీవ్ర ఆత్మరక్షణలో పడేసింది. ముఖ్యంగా కదిరి నియోజకవర్గ పరిధిలోని ఆరు మండలాల్లో నాలుగు జడ్పీటీసీ స్థానాలను.. కదిరి రూరల్, తలుపుల, నంబులపూలకుంట, గాండ్లపెంటలను వైసీపీ కైవసం చేసుకోవడం స్థానిక రాజకీయాల్లో పెను సంచలనంగా మారింది. కదిరి రూరల్‌లో వైసీపీ నేత వజ్రా భాస్కర్ రెడ్డి చేతిలో టీడీపీ అభ్యర్థి ఓడిపోగా, తలుపులలో జనసేన అభ్యర్థిపై వైసీపీ అభ్యర్థి షర్మిల ఏకంగా 6,300 ఓట్ల భారీ మెజారిటీతో గెలుపొందారు.
ఇక టీడీపీకి బలమున్న నంబులపూలకుంటలో మిత్రపక్షమైన బీజేపీకి సీటు కేటాయించడం కూటమి కొంపముంచింది. అక్కడ మైనారిటీ వ్యక్తి హత్య కేసులో నిందితుడి కుటుంబ సభ్యురాలిని బీజేపీ బరిలోకి దించడంతో తీవ్ర వ్యతిరేకత వ్యక్తమై వైసీపీ అభ్యర్థి అనురాధ విజయం సాధించారు. గాండ్లపెంటలోనూ తమ్ముళ్ల నిర్లిప్తత, అంతర్గత అసమ్మతి వల్ల వైసీపీ అభ్యర్థి రోహిణి విజయం సాధించారు. అయితే, నల్లచెరువు నుంచి బరిలోకి దిగిన జడ్పీ చైర్మన్ అభ్యర్థి పరిటాల శ్రీరామ్ 4,000 పైగా ఓట్లతో ఘనవిజయం సాధించగా, తనకల్లులో టీడీపీ అభ్యర్థి హరినాయక్ గెలిచి టీడీపీ పరువు నిలబెట్టారు.
ఈ విలక్షణమైన ఫలితాలు స్థానిక టీడీపీ ఎమ్మెల్యే కందికుంట వెంకట ప్రసాద్‌కు ఓటర్లు పంపిన స్పష్టమైన హెచ్చరికగా పొలిటికల్ అనలిస్టులు భావిస్తున్నారు. ఎంపీటీసీల్లో టీడీపీకి స్పష్టమైన మెజారిటీ ఉన్నప్పటికీ, జడ్పీటీసీల దగ్గరకు వచ్చేసరికి కూటమి ఓట్లు బదిలీ కాకపోవడం, అభ్యర్థుల ఎంపికలో తప్పులు మరియు నాయకుల మధ్య సమన్వయ లోపం కదిరి కోటలో కోలుకోలేని దెబ్బ కొట్టాయి. నామినేషన్ల నుంచి కౌంటింగ్ వరకు ఎన్నికలు ఎంతో ప్రశాంతంగా సాగినప్పటికీ, కూటమి ఎమ్మెల్యే ఈ ఓటమిపై తక్షణమే ఆత్మపరిశీలన చేసుకోవాల్సిన అవసరం ఎంతైనా ఉంది. మరోవైపు ఈ విజయంతో వైసీపీ శ్రేణుల్లో కొత్త ఉత్సాహం వచ్చినప్పటికీ, ఎంపీటీసీల్లో పట్టు కోల్పోయిన విషయాన్ని గుర్తించి విర్రవీగకుండా బాధ్యతాయుతమైన ప్రతిపక్ష పాత్ర పోషించాల్సి ఉంటుంది.