YS Viveka’s Death Mystery :వైఎస్ వివేకానందరెడ్డిని ఎవరు చంపించారో తెలుగు మీడియా ఎప్పుడో డిసైడ్ చేసేసింది. వైఎస్ జగన్ మోహన్ రెడ్డిని దోషిగా టీడీపీ అనుకూల మీడియా చూపిస్తే, చంద్రబాబుని దోషిగా వైసీపీ అనుకూల మీడియా చిత్రీకరిస్తూ తీర్పులెప్పుడో వెల్లడయిపోయాయ్. కానీ, మీడియా తీర్పులతో శిక్షలు పడవు కదా.?
రాజకీయ నాయకుడు, మాజీ మంత్రి, మాజీ ఎంపీ.. ఇలాంటి వ్యవహారాల్ని పక్కన పెడితే, 60 ఏళ్ళు పైబడిన ఓ వ్యక్తి అత్యంత కిరాతకంగా చంపాల్సిన అవసరమేమొచ్చింది.? అన్నదే అత్యంత కీలకమైన విషయమిక్కడ. పైశాచికత్వం ప్రదర్శించారు వైఎస్ వివేకానందరెడ్డిని చంపేసే క్రమంలో హంతకులు.
కేవలం రాజకీయ కోణంలోనే హత్య జరిగిందని అనలేం. అంతకు మించి, ఏదో బలమైన కారణం వివేకా హత్య వెనుకాల వుండాలి. ఎమ్మెల్సీ టిక్కెట్టు విషయంలో.. ఎంపీ టిక్కెట్టు విషయంలో.. ల్యాండ్ సెటిల్మెంట్ల వ్యవహారంలో.. అంటూ చాలా తేలికైన అంశాలు వైఎస్ వివేకానందరెడ్డి హత్య కేసుకు సంబంధించి సీబీఐ వెలుగులోకి తెస్తోంది.
నిజమే కావొచ్చు, ఆ అంశాలు కూడా కారణమై వుండొచ్చు. సీబీఐ ఏం తేల్చుతుంది.? అన్నది ప్రస్తుతానికి సస్పెన్స్. సీబీఐ ఏం చెప్పినా, ఏం తేల్చినా.. అంతిమంగా ఈ కేసులో వాస్తవాల్ని రూఢీ చేయాల్సింది న్యాయస్థానం. న్యాయస్థానాలు ఎలాంటి తీర్పునిస్తాయోగానీ, ఈ కేసులో రాజకీయాలు.. కేసుని తప్పుదోవ పట్టించేలా నడుస్తుండడం అత్యంత శోచనీయం.
టీడీపీ, వైసీపీ.. ఇలా ఎవరూ తగ్గట్లే.! విపక్షాలు రాజకీయమే చేస్తాయ్.. ఆ రాజకీయాన్ని తిప్పికొట్టాల్సిన బాధ్యత వైసీపీ మీద వుందిగానీ, వైసీపీ నుంచి స్పందన కూడా కొత్త అనుమానాలకు తెరలేపేలా వుండడమే ఆశ్చర్యకరమిక్కడ.