Kamma Leaders : కమ్మ సామాజిక వర్గానికి వైఎస్ జగన్ మంత్రి వర్గంలో చోటు దక్కలేదు. కొడాలి నాని కాకపోతే, ఇంకో కమ్మ ఎమ్మెల్యేకి మంత్రి పదవి ఇచ్చి వుండాల్సింది. నిజానికి, బొత్సను కొనసాగించినప్పుడు.. కొడాలి నానిని కూడా వైఎస్ జగన్ కొనసాగించి వుండాలి. కేవలం ‘కమ్మ’ కోణంలోనే కొడాలిని వైఎస్ జగన్ పక్కన పెట్టారన్న సంకేతాలు జనంలోకి బలంగా వెళ్ళిపోయాయి.
కమ్మ సామాజిక వర్గం ఈ విషయమై తీవ్ర అసంతృప్తితో వుంది.
వచ్చే ఎన్నికల్లో కమ్మ సామాజిక వర్గం నుంచి తమకు ఓట్లు పడవని వైసీపీ అధినేతకు అర్థమవడంతోనే, వ్యూహాత్మకంగా ఆ సామాజిక వర్గాన్ని మంత్రి పదవి నుంచి దూరం పెట్టారనే చర్చ రాజకీయ, మీడియా వర్గాల్లో జరుగుతోంది.
వైశ్య సామాజిక వర్గం విషయంలోనూ ఇలాగూ జరిగింది. మరికొన్ని ప్రధాన సామాజిక వర్గాలకు మంత్రి వర్గంలో చోటు దక్కలేదు. చిత్రమేంటంటే కొన్ని సామాజిక వర్గాల ప్రాబల్యం ఎక్కువగా వున్న కొన్ని జిల్లాల్లో అసలు మంత్రి పదవులే లేకపోవడం.
దాంతో, ఆయా జిల్లాల్లో వైసీపీ నేతలకు స్థానిక నేతల నుంచి తీవ్రస్థాయిలో వ్యతిరేకత ఎదురవుతోందిట.
మిగతా వ్యవహారాలు పక్కన పెడితే, అమరావతిని కమ్మరావతిగా అభివర్ణించినప్పుడే.. వైసీపీలో కమ్మ వ్యతిరేకత ఏంటో అందరికీ అర్థమయిపోయింది. కానీ, కొడాలి నాని మాత్రం ‘అబ్బే అదేం లేదు..’ అంటూ బుకాయిస్తూ వచ్చారు. ఇప్పుడూ ఆయన అదే బుకాయింపు కొనసాగిస్తున్నారు.
నిజానికి, ఓ సామాజిక వర్గానికి పదవి దక్కకపోవడం అనేది పెద్ద విషయమే కాదు. అధికారానికి దూరంగా చాలా సామాజిక వర్గాలున్నాయి. మరి, అలాంటి వర్గాలూ తమకు పదవి ఎందుకు దక్కలేదని నిలదీస్తే.? ప్రభుత్వాలు ఏమైపోతాయ్.?