Perni Nani : వైఎస్ జగన్ మంత్రి వర్గంలో ‘బాగా మాట్లాడగలిగిన’ నాయకుల్లో ఒకరిగా పేర్ని నాని పేరు సంపాదించుకున్నారు. మంత్రి వర్గ నిర్ణయాల్ని ఆయనే మీడియాకి వివరించేవారు. మరి, అలాంటి పేర్ని నాని విషయంలో ఎందుకు వైఎస్ జగన్ ‘కొనసాగింపు’ నిర్ణయం తీసుకోలేకపోయారు.? మంత్రిగా ఆయన ఏం సాధించారు.? అన్నదాన్ని పక్కన పెడితే, వైఎస్ జగన్ మోహన్ రెడ్డిని వెనకేసుకురావడంలో ఆయన చాలా చాలా కష్టపడ్డారు.. అధినేత మెప్పు పొందేందుకు నానా పాట్లూ పడ్డారు.
మరి, వ్యవహారం ఎక్కడ బెడిసి కొట్టింది.? కొన్నాళ్ళ క్రితం ముఖ్యమంత్రి వైఎస్ జగన్ మోహన్ రెడ్డి పోలవరం సందర్శనకు వెళితే, అక్కడ కొందరు పోలీస్ అధికారులు.. పేర్ని నాని వాహనాన్ని వేరే చోట పార్క్ చేయమని కోరారు.
కానీ, దానికి పేర్ని నాని గుస్సా అయ్యారు. పోలీసుల మీద మండిపడ్డారు. ఓ రకంగా చెప్పాలంటే ‘జులుం’ ప్రదర్శించరారు. దాంతో ప్రభుత్వానికి చాలా చెడ్డపేరు వచ్చింది.
నిజానికి, దాదాపు ఇదే తీరులో మంత్రి సీదిరి అప్పలరాజు కూడా పోలీసు అధికారులతో వ్యవహరించినా.. ఆయన విషయంలో వేరే ఈక్వేషన్ పని చేసిందట.
పేర్ని నానికి వున్న ఇంకో మైనస్ పాయింట్.. సినీ పరిశ్రమతో వివాదం. పరిశ్రమను చిన్నచూపు చూసేలా పలువురు వైసీపీ మంత్రులు వ్యాఖ్యలు చేశారు. వారిలో చాలామంది ఔట్ అయిపోయారు.
అధినేత మెప్పు కోసమే తాము అదంతా చేశామని సదరు నేతలు ఇప్పుడు వాపోతున్నా.. వాళ్ళ మీద వేటు పడటానికి అది కూడా ఓ కారణం.
ఇక, సీనియర్ నటుడు మోహన్బాబు ఇంటికి వెళ్ళి, ప్రభుత్వం తరఫున సినీ పరిశ్రమ సమస్యల వ్యవహారంపై వివరణ ఇచ్చానంటూ పేర్ని నాని చెప్పారో లేరోగానీ.. ఆయన వివరణ ఇచ్చారంటూ మంచు విష్ణు ట్వీటేసి, పేర్ని నాని పరువు తీసేశారు. అది కూడా ముఖ్యమంత్రి ఆగ్రహానికి కారణమయ్యిందంటున్నారు.