మెగాస్టార్ చిరంజీవి అభిమానులందు పవన్ కళ్యాణ్ అభిమానులు వేరయా.. అని కొందరు అనుకోవచ్చుగాక.! కానీ, మెగాస్టార్ చిరంజీవిని అభిమానించేవారెవరూ పవన్ కళ్యాణ్ని వ్యతిరేకించరు. ఇదైతే క్లియర్. పవన్ కళ్యాణ్ అభిమానులూ అంతే. మెగాస్టార్ చిరంజీవి అభిమానుల్లో పవన్ కళ్యాణ్ని ఇంకాస్త ఎక్కువ అభిమానులు వుండొచ్చు. వాళ్ళే ‘పవనిజం’ అంటూ చెబుతుండొచ్చు. అంతే తేడా.
‘నా గమ్యం.. పవన్ కళ్యాణ్ గమ్యం ఒకటే..’ అని చిరంజీవి చాలా సందర్భాల్లో చెప్పారు.. రాజకీయాల విషయాన్ని ప్రస్తావించినప్పుడు. ‘మా దారులు వేరు, మా ఆలోచనలు వేరు.. కానీ, రాజకీయాల్లోకి వచ్చింది మాత్రం ఒకే లక్ష్యంతో. నేను సక్సెస్ అవలేకపోయాను.. కానీ, రెండు పడవల ప్రయాణం విషయంలో పవన్ కళ్యాణ్ సమర్థుడని నేను నమ్ముతున్నాను..’ అని చిరంజీవే స్వయంగా చెప్పాక.. వివాదమేముంది.?
మాజీ మంత్రి వెల్లంపల్లి శ్రీనివాస్ మాత్రం, చిరంజీవి పేరు ప్రస్తావిస్తూ నాగబాబునీ, పవన్ కళ్యాణ్నీ విమర్శించేస్తున్నారు. ‘మెగాభిమానులు జనసేనకు మద్దతిస్తారు..’ అని నాగబాబు చెబితే, దాన్ని తప్పు పట్టాలని వెల్లంపల్లికి ఎలా అనిపించిందో ఏమో.!
మెగా అభిమానులందరూ నాగబాబుతో టచ్లో వుంటారు. అభిమాన సంఘాల్ని ఒక్కతాటిపై నడిపించేది నాగబాబు మాత్రమే. అది వెల్లంపల్లికి తెలియదని ఎలా అనగలం.? గతంలో చిరంజీవితో వెల్లంపల్లికీ పరిచయం వుంది. ఇక, పవన్ కళ్యాణ్ దయా దాక్షిణ్యాలతో వెల్లంపల్లి శ్రీనివాస్, అప్పట్లో బీజేపీలో కొంత ఎదిగిన మాట కూడా వాస్తవం.
పవన్ కళ్యాణ్ మీదా, నాగబాబు మీదా వైసీపీ నేతలు విమర్శలు చేయడమంటే, వైసీపీ పట్ల మెగాభిమానుల్లో మరింత వ్యతిరేకత పెంచుకోవడమే. అయినా, పవన్ కళ్యాణ్ని విమర్శిచినందుకుగాను పేర్ని నాని, కొడాలి నాని, అవంతి శ్రీనివాస్, కన్నబాబు, వెల్లంపల్లి ఏం మేలు వైఎస్ జగన్ ద్వారా పొందగలిగినట్టు.? పదవులు పోగొట్టుకోవడం తప్పిస్తే.!