తెలుగుదేశం పార్టీ తెలంగాణలో అత్యంత దయనీయ స్థితిని ఎదుర్కొంటోన్నది పాత మాటే. కొత్తగా వచ్చిన మార్పులేమీ లేవు. పతనమైపోవడం, మరింత పతనమైపోవడం.. అంతే తేడా. తెలుగుదేశం పార్టీలో నెంబర్ టూ.. అనదగ్గ నాయకులంతా టీడీపీని వీడి వెళ్ళిపోతూ వస్తున్నారు. ఈ ప్రవాహం ఆగడంలేదు. తెలంగాణలో టీడీపీకి మనుగడ లేదన్న నిర్ణయానికి వచ్చేసినవారెవరూ పార్టీలో వుండలేకపోతున్నారు.
టీడీపీని అంటిపెట్టుకుని వుండడం వల్ల రాజకీయంగా తమ స్థాయి మరింత దిగజారిపోవడం తప్ప, ఎదుగుదల అనేదే వుండదన్న గట్టి నమ్మకం తెలంగాణ టీడీపీ నాయకుల్లో ఎప్పుడో ఏర్పడిపోయింది. దానికి చంద్రబాబు అనుసరించిన, అనుసరిస్తున్న విధానాలే కారణం. వైఎస్ జగన్ మోహన్ రెడ్డి, వైఎస్సార్ కాంగ్రెస్ పార్టీని తెలంగాణలో వదులుకుని, ఆంధ్రపదేశ్ రాష్ట్రంలో అధికారం దక్కించుకున్నారు.
అనంతరం తెలంగాణలో తన సోదరి షర్మిల ద్వారా కొత్త రాజకీయానికి తెరలేపారు. ఆ మాత్రం తెలివి 40 ఇయర్స్ పొలిటికల్ ఇండస్ట్రీ.. అని చెప్పుకునే చంద్రబాబుకి లేకుండా పోయింది. ఓ దేవేందర్ గౌడ్, ఓ నాగం జనార్ధన్ రెడ్డి, ఓ ఎర్రబెల్లి దయాకర్ రావు, ఓ రేవంత్ రెడ్డి.. ఇలా పార్టీ ముఖ్య నేతలు (నెంబర్ టూ అనదగ్గవారు) టీడీపీని వీడి చాలాకాలమే అయ్యింది. ఆయా సందర్భాల్లో వాళ్ళంతా చంద్రబాబుకి హ్యాండ్ ఇచ్చేస్తూ వచ్చారు. తాజాగా టీడీపీ తెలంగాణ అధ్యక్షుడు ఎల్. రమణ కూడా టీడీపీకి గుడ్ బై చెప్పేయబోతున్నారు. త్వరలో ఆయన తెలంగాణ రాష్ట్ర సమితిలో చేరబోతున్నారట.
ఇందుకోసం ఆయన రంగం సిద్ధం చేసేసుకున్నారనీ, మంత్రి ఎర్రబెల్లి దయాకర్ రావు, ఎల్ రమణతో చర్చలు జరుపుతున్నారనీ తెలుస్తోంది. సో, టీడీపీకి మళ్ళీ తెలంగాణలో కొత్త అధ్యక్షుడి అవసరం ఏర్పడిందన్నమాట. ఇటీవలే టీడీపీ, పార్టీ వ్యవస్థాపక దినోత్సవ సంబరాల్ని జూమ్ ద్వారా నిర్వహించింది. ఇంతలోనే టీడీపీకి సూపర్ షాక్ తగలబోతుండడం గమనార్హం. ఇదంతా చంద్రబాబు స్వయంకృతాపరాధమే.