స్టార్ కమెడియన్‌గా వరుస సినిమాలతో బిజీగా ఉండే సునీల్ ఇప్పుడు అడపా దడపా సినిమాలతో సరిపెట్టుకోవల్సి వస్తోంది. పూర్తి స్థాయి కమెడియన్ పాత్రలకు దాదాపు చెక్ పెట్టేశాడు సునీల్. వేరియేషన్ ఉన్న పాత్రలను ఎంచుకోవడానికి ఇష్టపడుతున్నాడు. పాత్రలో నెగిటివ్ షేడ్స్ ఉన్నా అస్సలు తగ్గట్లేదు.
ఇటు హీరోగానూ కాక, అటు క్యారెక్టరు ఆర్టిస్టుగానూ కాక రెండు పడవల ప్రయాణం చేస్తున్నాడంటూ ఆయన అభిమానుల్లో కొంత అసహనం ఉండగా, తాజాగా సునీల్ ఓ కొత్త చిత్రంతో ప్రేక్షకుల ముందుకు రాబోతున్నాడు. అదే ‘బుజ్జీ.. ఇలారా..’. సైకలాజికల్ థ్రిల్లర్ అనేది క్యాప్షన్. లేటెస్టుగా ఈ సినిమా టీజర్ రిలీజైంది.
ఈ సినిమాలో సునీల్‌తో పాటు మరో కమెడియన్ ధన్‌రాజ్ కూడా కీలక ప్రాతలో నటిస్తున్నాడు. ఇద్దరూ పోలీస్ ఆఫీసర్లే. వరంగల్ నగరంలో జరుగుతున్న వరుస కిడ్నాపులు మరియు హత్యల మిస్టరీని ఛేదించే కథాంశంతో ఈ సినిమా రూపొందుతోంది. కామెడీ కథా చిత్రాల దర్శకుడు జి.నాగేశ్వర రెడ్డి ఈ సినిమాకి కథ, స్ర్కీన్‌ప్లే అందించారు.
ఇదిలా ఉంటే, సునీల్ నుంచి ఇక కామెడీ ఎక్స్‌పెక్ట్ చేయలేమా.? అంటూ ఆయన అభిమానులు అభిప్రాయ పడుతున్నారు. అయితే, అలాంటిదేమీ లేదనీ, హీరో రోల్, విలన్ రోల్, ఇంపార్టెంట్ రోల్ ఏదైనా తనకు ఓకే అని, అదే టైమ్‌లో కామెడీ రోల్ సెట్టయినా కాదనననీ, ఆ విషయంలో ఫ్యాన్స్ ఏ మాత్రం డిజప్పాయింట్ కావద్దనీ, సునీల్ చెబుతున్నారు.