అధికార పార్టీకి చెందిన ఎంపీ మీద దారుణమైన ఆరోపణలు వస్తే, ఆయనకు క్లీన్ చిట్ లభించేస్తుంటుంది. అదే విపక్షాలకు చెందిన నేతల మీద అయితే, చిన్న చిన్న విషయాలకే అరెస్టులు చేసేసి, లోపలేసేస్తుంటారు.! ఇదీ ఆంధ్రప్రదేశ్లో రాజకీయం.!
చంద్రబాబు హయాంలో జరిగిందదే, వైసీపీ హయాంలోనూ జరుగుతున్నది అదే.! ఏం మారలేదు. ఆంధ్రప్రదేశ్ పోలీసులు, అధికారంలో వున్న వారికి తొత్తులగా వ్యవహరిస్తున్నారన్న విమర్శలు కొనసాగుతూనే వున్నాయి. రూల్స్ కేవలం విపక్షాలకు చెందినవారికి మాత్రమేనన్నట్లు అధికారంలో వున్నవారు వ్యవహరించడం కొత్తేమీ కాదు.
అసలు విషయంలోకి వస్తే, ఆంధ్రప్రదేశ్ ముఖ్యమంత్రి వైఎస్ జగన్ మోహన్ రెడ్డి ఇటీవల ప్లాస్టిక్ ఫ్లెక్సీలపై బ్యాన్ విధిస్తున్నట్లు ప్రకటించారు. నిషేధం అమల్లోకి వచ్చిందా.? లేదా.? అన్నదానిపై భిన్న వాదనలున్నాయి. సాక్షాత్తూ ముఖ్యమంత్రి ప్రకటన చేశారు గనుక, వైసీపీలో ఎవరూ ప్లాస్టిక్ ఫ్లెక్సీలను వాడకూడదు. అది నైతికత. కానీ, వైసీపీ నేతలు యధేచ్ఛగా ప్లాస్టిక్ ఫ్లెక్సీలు వాడేస్తున్నారు.. పార్టీ ప్రచారం కోసం.
రాష్ట్రంలో ఆ చివర నుంచి ఈ చివర వరకూ అన్ని జిల్లాల్లోనూ కొత్త కొత్తగా వైసీపీ ఫ్లెక్సీలు వెలుస్తూనే వున్నాయి.. అన్నీ ప్లాస్టిక్ ఫ్లెక్సీలే.! చిత్రంగా విపక్షాలు మాత్రం ఒకింత వెనుకడుగు వేస్తున్నాయి. ఇప్పటికే సిద్ధం చేసుకున్నవి తప్ప, కొత్తగా విపక్షాలేవీ ప్లాస్టిక్ ఫ్లెక్సీలు కట్టడంలేదు. ఎందుకంటే, కేసులు పెట్టి ప్రభుత్వం ఇబ్బంది పెడుతుందేమోనన్న భయం.!
ఇదెక్కడి పంచాయితీ.? అధికార పార్టీ నాయకులకు లేని అడ్డంకులు, విపక్షాలకే ఎందుకు.? అదంతే, ఆంధ్రప్రదేశ్లో ఇంతే.. అని విపక్షాలు విమర్శలు గుప్పిస్తున్నాయి. ప్లాస్టిక్ బ్యాన్.. అని ముఖ్యమంత్రి ప్రకటించేశారుగానీ, తదనంతరం ప్రభుత్వం తీసుకుంటున్న చర్యలపై ఇంకా స్పష్టత లేదు.