సినీ ఇండస్ట్రీలో పవర్ స్టార్ పవన్ కళ్యాణ్ కి ఉన్న డిమాండ్.. రేంజ్ వేరు. ఇంతకుముందెన్నడూ లేనివిధంగా పవన్ కళ్యాణ్ హీరోగా వరుసగా సినిమాలను పూర్తి చేస్తున్నారు. అయితే రాజకీయాల్లో బిజీగా ఉంటూనే.. ప్రజా సేవే లక్ష్యంగా ఉన్న నేపథ్యంలో కూడా సినిమాల్లో రీఎంట్రీ ఇచ్చారు పవన్ కళ్యాణ్.. వచ్చీ రావడంతో హిందీ లో బ్లాక్ బస్టర్ గా నిలిచిన పింక్ సినిమా రీమేక్ తో వకీల్ సాబ్ గా తెలుగు ప్రేక్షకుల్ని అలరించనున్నారు. ప్రస్తుతం ఈ సినిమా రిలీజ్ కు సన్నాహాలు చేస్తున్నారు. దీంతో పాటు పవన్ కళ్యాణ్ పక్కా కమర్షియల్ యాక్ట్ తో చేసే సినిమాలు ఏడాదికి ఒక్క సినిమా మాత్రమే విడుదల ఉండేది. అయితే ఇప్పుడు పవన్ సినీ కెరీర్ లోనే ఈ ఏడాది రెండు సినిమాల్ని రిలీజ్ చేస్తున్నట్లు తెలుస్తుంది. ఇది ఖచ్చితంగా యాధృచ్చికమే అంటున్నాయి సినీ వర్గాలు.
కానీ 2012 వ సంవత్సరంలో మాస్ హిట్ గబ్బర్ సింగ్ తో పాటు కెమెరామెన్ గంగతో రాంబాబు సినిమాలు రిలీజ్ అయ్యాయి. రాజకీయాలతో పాటు తెలుగు ప్రేక్షకుల్ని తన నటనతో అలరించడానికి సిద్దమయిన వకీల్ సాబ్ సినిమా త్వరలోనే విడుదల కానుంది. దీని తర్వాత డైరెక్టర్ క్రిష్ తో చేస్తున్న పీరియాడిక్ వండర్ సినిమా కూడా ఇదే ఏడాదిలో విడుదలవుతుందని ఫిల్మ్ టీమ్ తెలిపింది. ఇదే కనుక నిజమైతే పవన్ కళ్యాణ్ అభిమానులకు పండగనే చెప్పుకోవాలి.
పవన్ కళ్యాణ్ పేరు చెబితేనే గుండెల్లో గుడి కట్టుకునే అభిమానులకి ఈ వార్త ఓ సంచలనంగా మారనుంది. ఎందుకంటే 2012 లో విడుదలైన గబ్బర్ సింగ్ సినిమా హిందీ రీమేక్.. అలాగే ఇప్పుడు రిలీజయ్యే వకీల్ సాబ్ సినిమా కూడా హిందీ సినిమా పింక్ రీమేక్. గబ్బర్ సింగ్ సినిమా బాక్సాఫీస్ దగ్గర బ్లాక్ బస్టర్ గా నిలిచిన విషయం తెలిసిందే.. ఇప్పుడు అదే సెంటిమెంట్ తో రిలీజవుతున్న వకీల్ సాబ్ సినిమాపై కూడా అభిమానుల్లో భారీ అంచనాలున్నాయి. ఈ సినిమాకి సంబంధించి ఇప్పటికే విడుదలైన మగువా పాటతో పాటు వకీల్ సాబ్ టీజర్ లు యూట్యూబ్ లో ట్రెండ్ ని సెట్ చేశాయి.