Katrina Kaif’s : మల్లీశ్వరి పుట్టింటికి తిరిగొస్తోంది మళ్లీ. పుట్టిల్లేంటీ.? మళ్లీ తిరిగి రావడమేంటీ.? అనుకుంటున్నారా.? అదేనండీ, కత్రినా కైఫ్ తొలి తెలుగు సినిమా ‘మల్లీశ్వరి’. సెన్సేషనల్ విజయం అందుకుందీ సినిమా. యూత్ హృదయాల్లో ‘మల్లీశ్వరి’గా అపురూపమైన స్థానం సంపాదించింది ఈ సినిమాతో కత్రినా కైఫ్.
ఆ తర్వాత బాలయ్యతో ఓ సినిమాలో నటించిందనుకోండి. ఆ సినిమా సక్సెస్ అంతంత మాత్రమే. ఆ పై అమ్మడు బాలీవుడ్‌కి చెక్కేసింది. కానీ, తెలుగు నాట ‘మల్లీశ్వరి’ క్రియేట్ చేసిన ఇంపాక్ట్ అంతా ఇంతా కాదు. ఇక్కడ వచ్చిన క్రేజ్‌తోనే బాలీవుడ్‌లో స్టార్‌డమ్ సంపాదించుకుందీ ముద్దుగుమ్మ.
కెరీర్ మొదట్లో డాన్సులు రావు, యాక్టింగ్ సరిగ్గా రాదు.. అనే విమర్శలు అందుకుంది. కానీ, ఎవరి దశ ఎప్పుడు ఎలా తిరుగుతుందో తెలీదు కదా.. టాలెంట్‌తో సంబంధం లేకుండా స్టార్‌డమ్ దక్కించుకున్న మల్లీశ్వరి, ఆ తర్వాత బాగా కష్టపడింది. వచ్చిన స్టార్‌డమ్‌ని నిలబెట్టుకోవడానికి తనను తాను బాగా కష్టపెట్టుకుంది.
ఫలితం అందుకుంది. యాక్టింగ్, డాన్స్..ఇలా తనను తాను కంప్లీట్‌గా మేకోవర్ చేసుకుంది. ‘మల్లీశ్వరి’ సినిమాలో నటించిన కత్రినా కైఫేనా.? అన్నంతలా అభిమానుల్నిఆశ్చర్యానికి గురి చేసింది. ఆ తర్వాత టాలీవుడ్ వైపు అస్సలు కన్నెత్తయినా చూడలేదనుకోండి.
తాజాగా అల్లు అర్జున్ సినిమా ‘పుష్ప -2’ కోసం లాంగ్ గ్యాప్ తర్వాత మల్లీశ్వరి పేరు తెలుగు తెరపై వినిపిస్తోంది. ఇప్పటికే కత్రినాతో సంప్రదింపులు కూడా జరిగాయట. కాగా, ఈ సినిమాలో దిశా పటానీ నటిస్తుందని ప్రచారం జరిగింది. మరి, కత్రినా సంగతేంటో చూడాలిక.