శివుని సంకల్పం ఉంటేనే కైలాస్ మానస సరోవర్ యాత్ర సాధ్యమవుతుందనే విశ్వాసం హిందువుల్లో ఉంటుంది. అయితే దాదాపు ఐదేళ్ల తర్వాత ఈ పవిత్ర యాత్రకు చైనా ప్రభుత్వం పచ్చజెండా ఊపింది. డోక్లామ్ ప్రతిష్ఠంభన, కరోనా, గల్వాన్ ఘర్షణల కారణంగా ఆగిపోయిన ఈ యాత్రకు 2024లో భారత ప్రధానమంత్రి నరేంద్ర మోడీ, చైనా అధ్యక్షుడు జి జిన్‌పింగ్ సమావేశం తర్వాత మార్గం సుగమమైంది. దీంతో 2025లో ఈ యాత్రకు అవకాశం లభించింది.
ఇప్పటికే జూన్ 30న యాత్ర ప్రారంభమైంది. భక్తులు మానస సరోవరంలో పవిత్ర స్నానాలు చేసి, కైలాస్ పర్వతానికి ప్రదక్షిణలు చేస్తారు. హిమాలయాల్లో ఉన్న ఈ ప్రాంతం స్వర్గ ద్వారంగా భావిస్తారు. స్కంద పురాణంలో కూడా హిమాలయాల గొప్పతనం ప్రత్యేకంగా చెప్పబడింది.
ఈసారి యాత్రకు రెండు మార్గాలు ఉన్నాయి. ఉత్తరాఖండ్‌లోని లిపులేఖ్ పాస్ మార్గం, సిక్కింలోని నాథులా పాస్ మార్గం. రెండు మార్గాలూ ఢిల్లీ నుండి ప్రారంభమవుతాయి. లిపులేఖ్ ద్వారా వెళ్ళేవారు ధార్చుల, బుధి, గుంజీ మీదుగా దార్చెన్ చేరుకుని అక్కడి నుండి కైలాస్ పర్వతం, మానస సరోవరాన్ని దర్శిస్తారు. ఈ ప్రయాణానికి 22 రోజులు పడుతుంది.
సిక్కింలోని నాథులా మార్గం గ్యాంగ్‌టాక్ నుండి షెరాథాంగ్, లాజీ, కాంగ్మా మీదుగా దార్చెన్ చేరి ఆపై కైలాస్ పర్వత దర్శనం చేస్తారు. సిక్కిం మార్గం ద్వారా యాత్ర పూర్తవడానికి 21 రోజులు పడుతుంది. సంవత్సరాల తర్వాత తిరిగి ప్రారంభమైన ఈ యాత్ర భక్తులకు అందలేని ఆధ్యాత్మిక అనుభూతి ఇవ్వనుంది. శివుని కృపకు గమ్యమైన ఈ యాత్రలో పాల్గొనాలనుకునేవారు జాగ్రత్తగా ప్రణాళిక వేసుకోవాలి.