టాలీవుడ్ స్టార్ హీరో నందమూరి బాలకృష్ణ సినిమాకు పాజిటివ్ టాక్ వస్తే బాక్సాఫీస్ వద్ద కొత్త రికార్డులు క్రియేట్ కావాల్సిందేనని అభిమానులు సైతం ఫిక్స్ అయ్యారు. మారుతున్న కాలానికి అనుగుణంగా దర్శకుల ఎంపికలో మారిన బాలకృష్ణ ప్రస్తుతం యంగ్ జనరేషన్ డైరెక్టర్లకు ఎక్కువగా అవకాశాలను ఇస్తూ బాక్సాఫీస్ వద్ద బ్లాక్ బస్టర్ హిట్లు సాధించే విధంగా అడుగులు వేస్తున్నారు. ఎంతోమంది డైరెక్టర్లకు లైఫ్ ఇచ్చిన హీరోలలో బాలకృష్ణ ఒకరని చెప్పవచ్చు.
అయితే బాలకృష్ణను స్టార్ హీరోను చేసిన సినిమా ఏదనే ప్రశ్నకు మాత్రం మంగమ్మ గారి మనవడు సినిమా పేరు సమాధానంగా వినిపిస్తుంది. కోడి రామకృష్ణ డైరెక్షన్ లో భార్గవ్ ఆర్ట్స్ ప్రొడక్షన్స్ బ్యానర్ పై తెరకెక్కిన ఈ సినిమా బాక్సాఫీస్ వద్ద సంచలన విజయాన్ని సొంతం చేసుకుంది. తమిళంలో బ్లాక్ బస్టర్ హిట్ గా నిలిచిన మన్ వాసనై సినిమాకు ఈ సినిమా రీమేక్ కావడం గమనార్హం. బడ్జెట్ తో పోల్చి చూస్తే ఈ సినిమాకు రెట్టింపు స్థాయిలో బిజినెస్ జరిగింది.
ఈ సినిమాలోని పాటలు ఊహించని స్థాయిలో హిట్ అయ్యాయి. భానుమతి, బాలకృష్ణ సినిమాలో పోటాపోటీగా నటించి ఈ సినిమా సక్సెస్ లో కీలక పాత్ర పోషించారు. 28 కేంద్రాలలో ఈ సినిమా 100 రోజుల పాటు ప్రదర్శించబడి అప్పట్లో అరుదైన రికార్డును సొంతం చేసుకుంది. సినిమాలో వీరయ్య పాత్రలో బాలయ్య అదరగొట్టారు. ఈ సినిమాతో స్టార్ స్టేటస్ ను సొంతం చేసుకున్న బాలయ్య కెరీర్ లో వెనుదిరిగి చూసుకోవాల్సిన అవసరం రాలేదు.
ఒక విధంగా బాలయ్య ఇమేజ్ ను మార్చిన సినిమాలలో మంగమ్మ గారి మనవడు ఒకటి అని చెప్పవచ్చు. మరోవైపు బాలయ్య తన తర్వాత సినిమాలతో బాక్సాఫీస్ వద్ద రికార్డులు క్రియేట్ చేయాలని ఫ్యాన్స్ కోరుకుంటున్నారు. బాలయ్య ప్రస్తుతం నటిస్తున్న సినిమాలపై బాలయ్య అభిమానులు చాలా ఆశలు పెట్టుకున్నారు. వయస్సు పెరుగుతున్నా బాలయ్యకు క్రేజ్ ఏ మాత్రం తగ్గలేదు.