విక్టరీ వెంకటేష్ సినీ కెరీర్ లో ఎన్నో సంచలన విజయాలు ఉన్నాయి. వెంకటేష్ నటించి తెలుగులో సక్సెస్ సాధించిన సినిమాలలో సుందరకాండ ఒకటి. వెంకటేష్ తన సినీ కెరీర్ లో ఎక్కువగా రీమేక్ సినిమాలలో నటించారు. తమిళంలో భాగ్యరాజా హీరోగా తెరకెక్కి సక్సెస్ సాధించిన సుందరకాండ సినిమా డబ్బింగ్ రైట్స్ ను కె.వి.వి.సత్యనారాయణ కొనుగోలు చేసి రామానాయుడు స్టూడియోస్ లో డబ్బింగ్ పనులు చేయించారు.
అయితే డబ్బింగ్ పనులు జరుగుతున్న సమయంలో తమిళ సుందరకాండ సినిమాను చూసిన వెంకటేష్ ఈ సినిమాను తెలుగులో రీమేక్ చేస్తే బాగుంటుందని అనుకున్నారు. అయితే అప్పటికే నిర్మాత సత్యనారాయణ డబ్బింగ్ హక్కులను బయ్యర్లకు అమ్మేశారు. ఈ విషయం తెలిసినా వెంకటేష్ ఈ సినిమాలో నటిస్తానని చెప్పడంతో సత్యనారాయణ బయ్యర్లకు అసలు విషయం చెప్పి రెట్టింపు డబ్బులు ఇచ్చి డబ్బింగ్ వెర్షన్ ను ఆపేశారు.
అయితే సత్యనారాయణ కేవలం డబ్బింగ్ హక్కులను మాత్రమే తీసుకోవడంతో ఈ సినిమాను తెలుగులో రీమేక్ చేయడంలో సమస్య ఎదురైంది. భాగ్యరాజాకు 25 లక్షల రూపాయలు ఇచ్చి సత్యనారాయణ రీమేక్ హక్కులు తీసుకున్నారు. ఈ విధంగా సినిమా షూటింగ్ కు ముందే ఏకంగా 45 లక్షల రూపాయలు ఖర్చైంది. అయితే తెలుగులో ఈ సినిమా ఘన విజయం సాధించడంతో నిర్మాతకు నష్టం రాలేదు.
అపర్ణ, మీనా ఈ సినిమాలో హీరోయిన్లుగా నటించగా కె.రాఘవేంద్ర రావు డైరెక్షన్ లో ఈ సినిమా తెరకెక్కింది. విక్టరీ వెంకటేష్ ప్రస్తుతం కొత్త ప్రాజెక్ట్ లను ప్రకటించలేదు. ఎఫ్3 సినిమాలో సక్సెస్ ను సొంతం చేసుకున్న వెంకటేష్ తర్వాత ప్రాజెక్ట్ లతో కూడా మంచి ఫలితాలను సొంతం చేసుకుంటానని భావిస్తున్నారు. వెంకటేష్ తర్వాత సినిమాలతో బాక్సాఫీస్ వద్ద ఎలాంటి ఫలితాలను అందుకుంటారో చూడాల్సి ఉంది.