గత కొన్నేళ్లలో టాలీవుడ్ సినిమాల బడ్జెట్లు ఊహించని స్థాయిలో పెరిగాయి. టాలీవుడ్ స్టార్ హీరోలు ఒక్కో సినిమాకు 50 కోట్ల రూపాయల నుంచి 100 కోట్ల రూపాయల రేంజ్ లో రెమ్యునరేషన్ తీసుకునే స్థాయికి ఎదిగారు. సీనియర్ స్టార్ హీరోలు 5 కోట్ల రూపాయల నుంచి 35 కోట్ల రూపాయల రేంజ్ లో పారితోషికాన్ని అందుకునే స్థాయికి ఎదగడం గమనార్హం. అయితే 30 సంవత్సరాల క్రితం కోటి రూపాయల బడ్జెట్ అంటే కూడా ఇండస్ట్రీ వర్గాలు ఆశ్చర్యపోయేవి.
అయితే 3 కోట్ల రూపాయల భారీ బడ్జెట్ తో బాలకృష్ణ, శోభన్ బాబు ప్రధాన పాత్రల్లో తెరకెక్కిన అశ్వమేధం సినిమా బాక్సాఫీస్ వద్ద డిజాస్టర్ గా నిలిచింది. ప్రముఖ టాలీవుడ్ నిర్మాతలలో ఒకరైన అశ్వనీదత్ బాలకృష్ణతో మంచి సినిమా నిర్మించాలని భావించి బాలయ్య, శ్రీదేవి కాంబినేషన్ లో ఒక సినిమాను సెట్ చేయాలని ప్రయత్నాలు చేశారు. రాఘవేంద్రరావు డైరెక్షన్ లో ఈ సినిమాను తెరకెక్కించాలని భావించగా అలా చేయడం సాధ్యపడలేదు.
బాలకృష్ణ, శ్రీదేవి కాంబినేషన్ కూడా సెట్ కాలేదు. ఆ తర్వాత బాలయ్య, శోభన్ బాబు కాంబినేషన్ లో అశ్వమేధం సినిమా మొదలైంది. మీనా, నగ్మా ఈ సినిమాలో హీరోయిన్లుగా నటించారు. ఇళయరాజా ఈ సినిమాకు సంగీతం అందించడం గమనార్హం. ఖర్చు విషయంలో రాజీ పడకుండా 3 కోట్ల రూపాయలు అశ్వనీదత్ ఈ సినిమాకు ఖర్చు చేశారు. అయితే ప్రేక్షకుల నుంచి ఈ సినిమాకు నెగిటివ్ టాక్ వచ్చింది.
నిర్మాత అశ్వనీదత్ కు కమర్షియల్ గా ఈ సినిమా భారీ మొత్తంలో నష్టాలను మిగిల్చిందని సమాచారం అందుతోంది. బాలయ్య సినీ కెరీర్ లో ఆశించిన స్థాయిలో సక్సెస్ ను సొంతం చేసుకోని సినిమాలలో ఈ సినిమా ఒకటిగా నిలిచింది. బాలయ్య ప్రస్తుతం గోపీచంద్ మలినేని డైరెక్షన్ లో భారీ బడ్జెట్ సినిమాలో నటిస్తున్నారు. ఈ సినిమాపై ఊహించని స్థాయిలో అంచనాలు ఏర్పడ్డాయి.