Hero sreekanth: తన కెరీర్లో సక్సెస్లతో పాటు, ఫెయిల్యూర్స్ కూడా చూశానని, కానీ ప్రతీ దాన్ని తాను ఎంజాయ్ చేస్తూ ముందుకు వెళ్లానని ప్రముఖ సినీ నటుడు శ్రీకాంత్ తెలిపారు. ఇండస్ట్రీకి వద్దామనుకొని వచ్చానని, ముందు హీరో అవుదామనుకొని కొన్ని సినిమాల్లో విలన్గా చేసినా, ఆ తర్వాత మళ్లీ హీరోగానే పైకి వచ్చానని ఆయన చెప్పారు. మళ్లీ ఇప్పుడు ప్రస్తుతం విలన్గా చేస్తున్నానని ఆయన నవ్వుతూ అన్నారు. తన 30 ఏళ్ల సినీ ప్రయాణంలో వెనక్కి తిరిగి చూసుకుంటే చాలా హ్యాపీగా అనిపిస్తుందన్న ఆయన, ఎందుకొచ్చాము అసలు ఇండస్ట్రీకి అని ఏనాడూ అనుకోలేదని ఆయన చెప్పారు. ఫెయిల్యూర్స్ వచ్చినా, సక్సెస్ వచ్చినా కూడా ఎప్పుడూ ఒకేలా ఉన్నానని ఆయన తెలిపారు.
తాను కెరీర్ ప్రారంభం నుంచే పెద్ద డైరెక్టర్ల దర్శకత్వంలో చేశానని శ్రీకాంత్ అన్నారు. విలన్గా చేసినా కూడా మంచి దర్శకులతో కలిసి పనిచేశానని ఆయన చెప్పారు. కొంత మంది అగ్ర హీరోలతో, హీరోయిన్ల పక్కన కూడా తాను చేశానని ఆయన అన్నారు. మొదట్లో ఒక రెండు సంవత్సరాల పాటు రెస్ట్లేస్గా వరుసగా దాదాపు 13 సినిమాలు చేశానని ఆయన చెప్పారు. ఆ సమయంలో అన్నీ ఫ్యామిలీ మూవీస్ ట్రెండింగ్ అన్న శ్రీకాంత్, ఒక మూవీ షూటింగ్ అయిపోగానే నెక్స్ట్ మూవీ రెడీగా ఉండేదని ఆయన తెలిపారు. అలా రాత్రి, పగలు కంటిన్యూయస్గా చేసేవారమని, అలా కొన్ని సంవత్సరాల పాటు చాలా బిజీ బిజీగా గడిచిపోయిందని ఆయన అన్నారు. ఒక్కోరి ఏ సినిమాకు పనిచేస్తున్నామో కూడా తెలిసేది కాదని, అసలు ఆ సినిమా హిట్ అవుతుందా లేదా అనేది కూడా సరిగా అర్థం కాకపోయేదని ఆయన చెప్పారు. అలా డైరెక్టర్లను నమ్మి చేసుకుంటూ వెళ్లిపోయేవాళ్లమని, అయినా కూడా ఎన్నో సందర్భాల్లో హిట్ కొట్టామని ఆయన అన్నారు.
ఇదిలా ఉండగా తాను చేసిన తాజ్ మహల్ సినిమాతో తన జీవితం మొత్తం మారిపోయిందని శ్రీకాంత్ చెప్పారు. డైరెక్టర్ చెప్పినట్టు అన్ని ప్రాజెక్టులు ఆపుకొని ఆ సినిమా చేశానన్న ఆయన, అనుకున్నట్టు గానే అక్కడ్నుంచి మళ్లీ వెనక్కి తిరిగి చూసుకోలేదని ఆయన అన్నారు. అయితే ముందుగా వేటగాడు సినిమాలో తానే హీరోగా చేయాల్సిందని శ్రీకాంత్ తెలిపారు. ఆ సినిమాకు అంతా రెడీ అయ్యాక, అనుకోని సిచ్యువేషన్లో కొన్ని కారణాల వల్ల ఆ ఛాన్స్ రాజశేఖర్ గారికి వెళ్లిందని, దాంట్లోని తాను పోలీస్ క్యారెక్టర్ చేశానని ఆయన అన్నారు. బాధపడ్డ సందర్భాలు కూడా ఉన్నాయన్న ఆయన, ఎక్కడ రాసి పెట్టి ఉంటే అక్కడికి వెళతాం అని తాను అనుకున్నట్టు శ్రీకాంత్ స్పష్టం చేశారు. అలా కొన్ని రోజులయ్యాక మళ్లీ ఎవరి సినిమాలు వాళ్లు చేసుకోవడం, అలా అన్నీ మామూలు అయిపోయాయని, అంతేగానీ వాళ్ల మీద కోపం పెట్టుకోవడం అలాంటివేం తాను చేయలేదని ఆయన వివరించారు.