David Warner: ఆస్ట్రేలియా డాషింగ్ ఓపెనర్ డేవిడ్ వార్నర్ సోషల్ మీడియాలో చాలా ఆక్టివ్ గా ఉంటాడన్న సంగతి సుపరిచితమే. అటు మైదానంలో తన విధ్వంసకరమైన ఆటతో అలరించే వార్నర్ ఖాళీ సమయాల్లో ఇంస్టాగ్రామ్ వేదికగా తనలోని మరో యాంగిల్ బయటపెడుతుంటాడు. అభిమానులు కూడా వార్నర్ వీడియోలను తెగ ఎంజాయ్ చేస్తారు. ముఖ్యంగా టాలీవుడ్ ఐకాన్ స్టార్ అల్లు అర్జున్ వీడియోలను తన ఫేస్ తో మార్ఫింగ్ చేసే వీడియోలకు విపరీతమైన స్పందన వస్తుంది.
తాజాగా ఇంస్టాగ్రామ్ లో వార్నర్ పెట్టిన వీడియో ఒకటి వైరల్ అవుతుంది. అల్లు అర్జున్ కొత్త మూవీ పుష్ప నుండి విడుదలైన ‘ఏయ్ బిడ్డ ఇది నా అడ్డా ‘ సాంగ్ లో బన్నీ పేస్ ని తన ఫేస్ తో రీప్లేస్ చేసి అప్లోడ్ చేశాడు. ఈ వీడియోకు అల్లు అర్జున్, విరాట్ కోహ్లీ, మిచల్ జాన్సన్ ల నుండి భిన్నమైన కామెంట్స్ వచ్చాయి. నువ్వు బాగానే ఉన్నావా? అని కోహ్లీ, తగ్గేదే లే… అని అల్లు అర్జున్, ప్లీజ్ ఇక ఆపేయ్… అని జాన్సన్ కామెంట్స్ చేశారు. కోహ్లీ కామెంట్ కి గొంతు పట్టేసినట్లుంది అని జవాబివ్వడంతో నెటిజన్లు వార్నర్ మాములోడుకాదు అని నవ్వుకుంటున్నారు.
ఇక ఇటీవలే మొదలైన ప్రతిష్టాత్మకమైన యాషెస్ సిరీస్ లో భాగంగా గబ్బాలో జరిగిన మొదటి టెస్ట్ మ్యాచ్ లో ఇంగ్లండ్‌పై ఆస్ట్రేలియా తొమ్మిది వికెట్ల తేడాతో బోణి కొట్టటంలో వార్నర్ పాత్ర కీలకంగా నిలిచింది. ఆస్ట్రేలియా మొదటి ఇన్నింగ్స్‌లో, అతను 94 పరుగులు చేశాడు. ఈ గెలుపుతో 1-0తో ఆస్ట్రేలియా ముందంజలో నిలిచింది. ఇక ఈ నెల 16 నుండి అడిలైడ్ లో రెండో టెస్ట్ జరగనుంది.