సినీ నటుడు అలీ, వైసీపీ ప్రభుత్వం నుంచి తీపి కబురు అందుకున్నారు. 2019 ఎన్నికల్లో వైసీపీ తరఫున ప్రచారం చేసినందుకుగాను, ఆయనకు ‘బహుమతి’ లభించింది. ఆంధ్రప్రదేశ్ ఎలక్ట్రానిక్ మీడియా సలహాదారుగా నామినేటెడ్ పదవి లభించింది అలీకి. ఈ మేరకు ఉత్తర్వులు కూడా విడుదలయ్యాయి.
తనకు వైఎస్ జగన్ మోహన్ రెడ్డి ఇచ్చిన బహుమతి పట్ల అలీ హర్షం వ్యక్తం చేశాడు కూడా. ‘థాంక్యూ జగన్ భయ్యా..’ అంటూ అలీ సతీమణి కూడా సంబరపడ్డారు. ఇక్కడిదాకా బాగానే వుంది.. అసలు అలీ, ఎలక్ట్రానిక్ మీడియా సలహాదారుగా ఏం చేయబోతున్నారు.? ఆ ఒక్కటీ అడక్కూడదంతే.
ఆ సంగతి పక్కన పెడితే, అలీకి డబుల్ ధమాకా.. అంటూ ఓ ప్రచారం తెరపైకొచ్చింది. ఒక బహుమతి అందరికీ తెలిసిందే.! ఆ ఇంకో బహుమతి ఏంటబ్బా.? అంటే, వచ్చే ఎన్నికల్లో అసెంబ్లీ టిక్కెట్ కూడా అలీకి కన్ఫామ్ అయ్యిందట.
అలీ 2024 ఎన్నికల్లో అసెంబ్లీకి పోటీ చేయబోతున్నారట.. అదీ వైసీపీ నుంచి. అయితే, ఈ విషయమై ఇప్పుడే తొందరపడి అధికారిక ప్రకటనలేవీ చేయొద్దని వైసీపీ భావిస్తోంది. ఆ దిశగా మాట్లాడొద్దని అలీకి కూడా వైసీపీ అధిష్టానం సూచించిందట.
అసెంబ్లీకి పోటీ చేయాలన్నది అలీ డ్రీమ్. లేని పక్షంలో శాసన మండలికి అయినా వెళ్ళాలని ఆయన అనుకున్నారు. రాజ్యసభ సీటు కోసం కూడా మేగ్జిమమ్ ట్రై చేశారు. కానీ, అవేవీ కుదరలేదు. వచ్చే ఎన్నికల్లో మాత్రం అలీ, పోటీ చేయడం ఖాయమట.
అసెంబ్లీకి పోటీ చేసే అవకాశాలు ఎక్కువగా వున్నాయనీ, లోక్ సభ సీటు విషయంలోనూ అలీకి కొంత అడ్వాంటేజ్ వుండొచ్చనీ అంటున్నారు. ఈ ప్రచారమే నిజమైతే, అలీకి డబుల్ ధమాకా అన్నట్లే.!