దుబ్బాక, తెలంగాణ: సోమవారం నాడు బీడీ కార్మికులకు కేంద్రం ఏ సాయం చేసిందో చర్చకు రావాలని, లేదంటే రాజీనామా చేయాలని బీజేపీ అధ్యక్షుడు బండి సంజయ్‌కు హరీశ్రావు సవాలు విసిరిన సంగతి తెలిసిందే. ఈ క్రమంలో బీజేపీ జాతీయ ఉపాధ్యక్షురాలు డీకే అరుణ తెలంగాణ ఆర్థిక మంత్రి హరీష్ రావుకు సవాలు విసిరారు.మంగళవారం ఆమె విలేకరుల సమావేశం నిర్వహించారు.
కేంద్ర నిధులపై సీఎం కేసీఆర్‌తో చర్చకు బండి సంజయ్ సిద్ధమే అని డీకే అరుణ తెలిపారు. హరీశ్‌రావుకు దమ్ముంటే ముఖ్యమంత్రి కేసీఆర్‌ను బండి సంజయ్‌తో చర్చకు ఒప్పించాలని సవాల్ చేశారు.‘‘కేంద్రం ఇస్తున్న నిధులపై రాష్ట్ర ఆర్థిక మంత్రికి స్పష్టత లేకపోవటం సిగ్గుచేటు. హరీష్ రావు తన పేరును.. అరిచే రావుగా మార్చుకోవాలి. చెరుకు శ్రీనివాసరెడ్డిని కాంగ్రెస్‌లోకి పంపి టికెట్ ఇప్పించింది హరీశ్‌ రావే. గజ్వేల్, సిద్ధిపేట, సిరిసిల్ల మీ కుటుంబం చేతిలో ఉంటే దుబ్బాక గెలవాలని ఎక్కడైనా రాసి ఉందా? టీఆర్ఎస్ అధికారం, డబ్బు బలంతో విజయం సాధించాలని చూస్తోంది. హరీశ్రావు ఓటమి భయంతో ఓటర్లను మభ్య పెడుతున్నారు. దుబ్బాకలో బీజేపీ కార్యకర్తల జోలికొస్తే టీఆర్ఎస్ అంతు చూస్తాం’’ అని డీకే అరుణ హెచ్చరించారు.
టీఆర్‌ఎస్‌పై ప్రజల్లో తీవ్ర వ్యతిరేకత ఉందని, దుబ్బాకలో తప్పకుండా బీజేపీ గెలుస్తుందని డీకే అరుణ ధీమా వ్యక్తం చేశారు. నవంబర్ 3న దుబ్బాక ఉప ఎన్నిక జరగనుండగా, 10న ఓట్ల లెక్కింపు జరగనున్న సంగతి తెలిసిందే. విజేతను అదే రోజు ప్రకటిస్తారు.