8 Vasantalu Movie: ఫణీంద్ర నర్సెట్టి దర్శకత్వంలో మైత్రి మూవీ మేకర్స్ నిర్మించిన లేటెస్ట్ మూవీ 8 వసంతాలు. లేడీ ఓరియంటెడ్ సినిమాగా ఈ సినిమా విడుదలైన విషయం తెలిసిందే. తాజాగా విడుదలైన ఈ సినిమాకు ప్రేక్షకుల నుంచి పాజిటివ్స్ స్పందన లభిస్తోంది. ఆడియన్స్ నుంచి ప్రశంసలు కూడా వస్తున్నాయి. ఈ ప్రేమకథా సినిమాకు ప్రేక్షకులు కూడా బాగా కనెక్ట్ అయ్యారు. అయితే ఈ సినిమా మంచి సక్సెస్ అవడంతో తాజాగా మూవీ మేకర్స్ ప్రెస్ మీట్ ను నిర్వహించారు. ఈ సందర్భంగా ప్రెస్ మీట్ లో భాగంగా ఒక రిపోర్టర్ మూవీలోని ఒక రెండు సీన్లపై తీవ్ర అభ్యంతరం వ్యక్తం చేశారు. ఇదే విషయం గురించి ప్రశ్నించారు.
పవిత్రమైన కాశీలో ఫైట్ సీక్వెన్స్, రేప్ సీక్వెన్స్ తీయడానికి కబేళా కావాల్సి వచ్చిందా అని డైరెక్టర్ ను ప్రశ్నించారు. అయితే ఈ సమావేశానికి దర్శకుడు హాజరు కాలేదు. ఈ ప్రశ్నకు దర్శకుడు ఫణీంద్ర నర్సెట్టి సోషల్ మీడియా వేదికగా స్పందించారు. ఫణీంద్ర తన ఇన్‌స్టాలో రాస్తూ.. నేరం చేసేవాళ్లు వారి విచక్షణా స్వభావంతోనే చేస్తారు.. కానీ వారి కులం, మతం ఆధారంగా చేయరు.. సామాజిక హోదాకు భిన్నంగా ప్రజలు ఉంటారని నేను చూపించే ప్రయత్నం చేశాను. కేవలం ఒక వర్గాన్ని వేలెత్తి చూపే ప్రయత్నం చేయలేదు. కబేళా అనేది ఎప్పటి నుంచో ఉంది. అది ఎక్కడైనా ఉండవచ్చు. అందుకు తగినట్లుగానే పాత్రలను ఎంపిక చేసుకున్నాను.
మీరు ఇదే విషయంలో కులాన్ని తీసుకురావాలనుకుంటే మిమ్మల్ని ఒక ప్రశ్న అడుగుతాను. రావణుడు ఎవరు? ఆయన ఒక బ్రాహ్మణుడి కుమారుడు. గొప్ప శివభక్తుడు. నుదుటిపై విభూతి, మెడలో రుద్రాక్షలు ధరిస్తాడు. ఆయనలో మారింది ఏంటి? ఉన్నత వర్గం నుంచి వచ్చి వేదాలు, పురాణ గ్రంథాలను చదివి చివరకు ఏం చేశాడు? మనిషి తన ప్రవర్తన, ఆలోచనా ధోరణి బట్టే నేరం చేస్తాడు. అంతేకానీ, అతని మతం, కులం అందుకు కారణం కాదు. అది మానవ నైజం. యద్భావం తద్భవతి. మీరు ఏం చూస్తారో అదే కనపడుతుంది. మీ దృష్టి కోణాన్ని మార్చుకోండి. దయ చేసి అనవసర విషయాలను ఈ సినిమాలో కలపకండి. వేదికపై పంతులు అనకుండా ఉండాల్సింది. మీరు దాన్ని సరిచేయటంలో తప్పులేదు. దాన్ని అక్కడితో వదిలేసి ఉంటే బాగుండేది. ఎందుకంటే అది మా టీమ్ ఉద్దేశం కాదు. ధన్యవాదాలు అంటూ పోస్ట్ చేశారు డైరెక్టర్.