చిన జీయర్ స్వామి తల్లి అలివేలు మంగతాయారు శనివారం పరమపదించిన విషయం తెలిసిందే. ఈనేపథ్యంలో చిన జీయర్ స్వామికి ఏపీ సీఎం వైఎస్ జగన్ ఫోన్ చేశారు. చినజీయర్ స్వామిని జగన్ ఫోన్ లో పరామర్శించారు. ఆయన తల్లి మృతి చెందడం పట్ల జగన్ తీవ్ర సంతాపాన్ని వ్యక్తం చేశారు. చిన జీయర్ స్వామి త్వరగా ఆ బాధ నుంచి కోలుకోవాలని జగన్ ఆకాంక్షించారు.
చిన జీయర్ స్వామి తల్లి మంగతాయారు వయసు 85 ఏళ్లు. ఆమె గత కొంతకాలంగా అనారోగ్యంతో బాధపడుతున్నారు. శనివారం రాత్రి 10 గంటలకు కన్నుమశారు.
తన తల్లి అంత్యక్రియలను చిన జీయర్ స్వామి.. శంషాబాద్ కు సమీపంలో ముచ్చింతల్ లో ఉన్న చినజీయర్ ఆశ్రమంలో నిర్వహించారు.
చిన్న జీయర్ స్వామికి తన తల్లి అంటే ఎంతో ప్రాణం. తన తల్లి మరణవార్తను జీయర్ స్వామి జీర్ణించుకోలేకపోయారు. సీఎం జగన్ ఫోన్ చేసినప్పుడు కూడా జీయర్ స్వామి భావోద్వేగానికి గురవడంతో జగన్ కూడా ఎమోషనల్ అయ్యారు. త్వరగా ఆ బాధ నుంచి తేరుకోవాలని జీయర్ స్వామికి జగన్ సూచించారు.