దీపావళి సమీపిస్తుంటే వాతావరణంలో ఒక ప్రత్యేక శక్తి, ఉత్సాహం కనిపస్తుంటుంది. ఇలాంటి సమయంలో మనం చూసే కలలు చాలా ముఖ్యమైన అర్థాన్ని కలిగి ఉంటాయని జ్యోతిషశాస్త్రం చెబుతోంది. ఇవి మన భవిష్యత్తులో జరగబోయే సానుకూల మార్పులకు సంకేతాలు ఇస్తాయని నమ్మకం. ముఖ్యంగా ఆర్థిక శ్రేయస్సు, కుటుంబ సుఖసంతోషం, వ్యక్తిగత ప్రగతికి సంబంధించిన సూచనలు ఈ కలల్లో దాగి ఉంటాయి. పండుగ రోజులు సమీపిస్తుండగా కొన్ని కలలు శుభం చేకూర్చేలా ఉంటాయని విశ్వాసం.
ఈ సమయంలో కలలో కమలం పువ్వు కనబడటం లక్ష్మీదేవి ఆశీర్వాదానికి సూచనగా భావిస్తారు. కమలం సంపద, శాంతి, సుఖసంతోషాల ప్రతీక. దీపావళికి ముందు ఇలాంటి కలలు కనబడితే, కుటుంబంలో ఆనందం, ఆర్థిక వృద్ధి, ఆధ్యాత్మిక శాంతి లభిస్తుందని జ్యోతిషశాస్త్రం సూచిస్తోంది. ఇది కొత్త అవకాశాలకు మార్గం తెరిచే శుభ సంకేతంగా చెప్పబడుతుంది. అలాగే ఆవు కనబడటం కూడా చాలా శుభప్రదంగా పరిగణిస్తారు. ఇది శ్రేయస్సు, ఆర్థిక లాభాలు, వ్యక్తిగత విజయానికి సంకేతం. ముఖ్యంగా వ్యాపారులు, ఉద్యోగస్తులు లేదా శ్రామిక వర్గానికి ఇది అదృష్టాన్ని తీసుకురావొచ్చని నమ్మకం ఉంది. ఆవు కలలో కనబడితే కష్టకాలం దూరమై, ఆర్థిక ఇబ్బందుల నుంచి విముక్తి లభించే అవకాశం ఉంటుందని జ్యోతిష్య విశ్లేషకులు చెబుతున్నారు.
బంగారం లేదా ఖజానా కలలో కనపడటం ధనవృద్ధికి బలమైన సంకేతం. ఇది పెట్టుబడులపై లాభాలు, కొత్త అవకాశాలు, స్థిరమైన ఆర్థిక స్థితి వైపు దారితీస్తుందని జ్యోతిషశాస్త్రం పేర్కొంటుంది. దీపావళి సమీపంలో ఇలాంటి కలలు కనబడితే ఆర్థికంగా ఎదుగుదల దిశగా మీరు అడుగులు వేస్తున్నారని అర్థం. కలలో పవిత్ర నదులు, గంగలు, సరస్సులు వంటి దృశ్యాలు కనబడటం కూడా మంచి సూచనే. ఇది జీవితంలో ప్రశాంతత, ఆర్థిక సౌఖ్యం, సానుకూల శక్తుల ప్రవాహాన్ని సూచిస్తుంది. నీరు పవిత్రతకు, ప్రవాహం కొత్త అవకాశాలకు ప్రతీక. పండుగ ముందు ఈ కలలు కనపడితే కుటుంబ సమస్యలు పరిష్కారమవడం, ఆర్థిక స్థిరత్వం పెరగడం జరగవచ్చని జ్యోతిషశాస్త్రం చెబుతోంది.
దీపావళి పండుగలో వెలుగుల పాత్ర ప్రత్యేకం. అందువల్ల ఆలయాలు లేదా వెలుగులు, దీపాలు కలలో కనబడితే అది అదృష్టం తలుపు తడుతున్నట్లు భావిస్తారు. ఇది విజయం, వెలుగు, మానసిక స్థిరత్వం, ఆధ్యాత్మిక ఎదుగుదలకు సంకేతంగా పరిగణించబడుతుంది. దీపావళి ముందు ఇలాంటి కలలు కనబడితే జీవితంలో సానుకూల మార్పులు చోటు చేసుకునే అవకాశం ఎక్కువ.
అయితే ఇవన్నీ జ్యోతిషశాస్త్రంలోని ప్రాచీన విశ్వాసాల ఆధారంగా చెప్పబడిన సూచనలు మాత్రమే. ప్రతి వ్యక్తి పరిస్థితులు వేరుగా ఉండే కారణంగా ఫలితాలు కూడా తేడాగా ఉండవచ్చు. అయినా ఇలాంటి కలలను శుభ సంకేతాలుగా పరిగణించి మన జీవనశైలిని మరింత సానుకూలంగా మలచుకోవచ్చు. దీపావళి వెలుగులు దగ్గరపడుతున్న ఈ సమయంలో కలల్లో కనిపించే సంకేతాలను ఆసక్తిగా గమనించడం అనేకమందికి ఆశావహ భావనను కలిగిస్తుంది. శ్రద్ధగా గమనిస్తే, ఈ కలలు భవిష్యత్తు శ్రేయస్సుకు దారి చూపే చిన్న హింట్స్గా మారవచ్చు. (గమనిక: ఈ కథనం పండితులు చెప్పిన వివరాల ఆధారంగా రాసినది. దీనిని తెలుగు రాజ్యం ధృవీకరించడం లేదు.)