AP Ministers Resignation : మొత్తంగా 24 మంత్రులూ రాజీనామా చేశారట. ఈ విషయాన్ని స్వయంగా రాజీనామా చేసిన ఆంధ్రప్రదేశ్ మంత్రులే సెలవిచ్చారు. ‘మేం రాజీనామా చేయడంపై ముఖ్యమంత్రే ఎక్కువగా బాధపడుతున్నారు.
కానీ, తప్పదు. మంత్రి పదవులకు రాజీనామా చేశాంగానీ, పార్టీ కోసం మరింత కష్టపడి పని చేస్తాం..’ అంటున్నారు మంత్రి కొడాలి నాని.
ఇంతకీ, కొడాలి నాని గతంలో చెప్పినట్టుగా మంత్రి పదవి పోతే విశ్వరూపం చూపిస్తారా.? చూపిస్తే అదెలా వుండబోతోంది.? మంత్రిగా వుండగానే ఆయన బూతుల ప్రవాహానికి హద్దూ అదుపూ లేకుండా పోయింది. ఇప్పుడాయన మాజీ మంత్రి అయిపోయారు.
సో, విశ్వరూపం ఎలా చూపించేస్తారో ఏమో.?
అన్నట్టు, ఓ నలుగురైదుగురు మంత్రులు కొనసాగే అవకాశం వుందట. వాళ్ళెవరన్నదానిపై ముఖ్యమంత్రి స్పష్టతనివ్వలేదట. ‘సమర్థత, అనుభవం’ కోణంలో కొందర్ని కొనసాగించనున్నట్లు మంత్రులకు క్యాబినెట్ సమావేశంలో వైఎస్ జగన్ చెప్పారట.
అంటే, మిగతావారెవరికీ అనుభవం లేదనా.? అసమర్థులనా.? అన్న ప్రశ్న రావడం సహజమే.
పైకి నవ్వులు చిందిస్తున్నా, తాజా మాజీ మంత్రులంతా ఒకింత అసహనంతోనే వున్నారు. అందర్నీ పీకేస్తే ఎవరూ ఫీలయ్యేవారు కాదేమో. కానీ, కొందర్ని మాత్రం కొనసాగించనున్నారనేసరికి.. ఎవరికి వారే ఫీలయిపోతున్నారు.
ఏప్రిల్ 11న కొత్త మంత్రుల పదవీ ప్రమాణ స్వీకారం జరుగుతుంది. చివరి క్యాబినెట్ భేటీ తర్వాత మంత్రి పదవులకు రాజీనామా చేసినవారంతా, తమ సొంత వాహనాల్లో బయటకు రావడం గమనార్హం.