Anam Ramnarayana : మాజీ మంత్రి, వైసీపీ ఎమ్మెల్యే ఆనం రాంనారాయణ రెడ్డికి షాక్ తగిలింది. మంత్రి పదవి దాదాపు ఖాయమనుకున్న ఆనం.. షాక్ తినాల్సి వచ్చింది. మంత్రి వర్గ పునర్ వ్యవస్థీకరణలో ఆనం పేరు ప్రముఖంగా వినిపించింది.
ఈ క్రమంలో ఆనం అనుచరులు సంబరాలకూ సిద్ధమయ్యారు. కానీ, తుది జాబితాలో ఆయన పేరు లేకుండా పోయింది.
అసలు ఆనం పేరుని ఎందుకు ముఖ్యమంత్రి పక్కన పెట్టారు.? దీనికి బలమైన కారణం లేకపోలేదు. జిల్లాల విభజన నేపథ్యంలో ఆనం, పార్టీ లైన్ని ధిక్కరించారు. అంతకు ముందు పలు సందర్భాల్లో పార్టీకీ, ప్రభుత్వానికీ చెడ్డపేరు వచ్చేలా వివాదాస్పద వ్యాఖ్యలు చేశారు.
వెరసి, ఆనం.. ముఖ్యమంత్రి వైఎస్ జగన్ ఆగ్రహానికి గురయ్యారు.
అన్నట్టు, ఆనం పార్టీ మారేందుకు సిద్ధంగా వున్నారనే ప్రచారం గత కొన్నాళ్ళుగా జరుగుతోంది. ఈ నేపథ్యంలోనే మంత్రి వర్గ పునర్ వ్యవస్థీకరణలో ఆనం పేరు ప్రచారంలోకి వచ్చింది. చివరి నిమిషంలో ఆనం పేరు పక్కకెల్ళిపోయింది.
మరిప్పుడు ఆనం ఏం చేయబోతున్నారు.? పార్టీ మారాల్సిందేనంటూ ఆనం రాంనారాయణరెడ్డి మీద ఆయన అభిమానులు, అనుచరులు, కార్యకర్తల నుంచి ఒత్తిడి పెరుగుతోంది. కానీ, ఇప్పుడున్న పరిస్థితుల్లో ఆయన వైసీపీని వీడటం కష్టమే.
అలాగని వైసీపీలోనే వుంటారా.? అంటే, అది ఇంకా ఇంకా కష్టం.
మింగలేక కక్కలేక.. ఇదీ ఇప్పుడు ఆనం రాంనారాయణరెడ్డి పరిస్థితి.