2023 లో వచ్చిన సూపర్ హిట్ సినిమాల్లో ‘బేబీ’ ఒక‌టి. ఎటువంటి అంచనాలు లేకుండా చిన్న సినిమాగా విడుదలై సంచలన విజయం సాధించింది సినిమాలో నటించిన అందరూ ఆర్టిస్ట్ టెక్నీషియన్స్ కు మంచి పేరు తెచ్చి పెట్టింది. ఈ సినిమా నిర్మాణంలో ప్రముఖ ద‌ర్శ‌కుడు మారుతి కీల‌క పాత్ర పోషించారు.
ఇప్పుడు మారుతి నుంచి ‘బేబీ’లాంటి మ‌రో సినిమా వ‌స్తోంది. దీనికి ‘బ్యూటీ’ అనే చ‌క్క‌టి టైటిల్ ఫిక్స్ చేశారు. సుబ్ర‌హ్మ‌ణ్యం ఆర్‌.వీ ద‌ర్శ‌క‌త్వం వ‌హిస్తున్న ఈ చిత్రాన్ని జీ స్టూడియోస్‌తో క‌లిసి మారుతి టీమ్ నిర్మిస్తోంది. ఏ. విజ‌య్ పాల్ రెడ్డి నిర్మాత. ఈనెల 22న ఈ చిత్రాన్ని లాంఛ‌నంగా ప్రారంభిస్తారు.
అప్పుడే టైటిల్ ని కూడా అధికారికంగా ప్ర‌క‌టిస్తారు. ‘బేబీ’లో సినిమాలో దాదాపు అంతా కొత్త‌వారే క‌నిపించారు. అయితే అందులో క‌ల్ట్ పాయింట్ ప‌ట్టుకొన్నారు. అది యూత్‌కి బాగా న‌చ్చింది. ఈ ‘బ్యూటీ’ కూడా అంతేన‌ని స‌మాచారం. యూత్ ని టార్గెట్ చేస్తూనే, ఫ్యామిలీ ఆడియ‌న్స్‌కి కూడా చేరువ‌య్యే పాయింట్ తో ఈ చిత్రాన్ని నిర్మిస్తున్నారు. ‘బేబీ’ ఫేమ్ విజ‌య్ బుల్గానిన్ ఈ చిత్రానికి సంగీతాన్ని స‌మ‌కూరుస్తున్నారు. ఇప్ప‌టికే 3 పాట‌ల్ని రికార్డ్ చేశారు. న‌టీన‌టులు దాదాపుగా కొత్త‌వారే. వారి వివ‌రాలు కూడా ఈ నెల 22నే తెలుస్తాయి.