క‌రోనా వ‌ల‌న వినోదం లేక విసిగిపోతున్న ప్రేక్ష‌కుల‌కి మంచి ఎంట‌ర్‌టైన్‌మెంట్ అందించిన బిగ్ రియాలిటీ షో బిగ్ బాస్ సీజ‌న్4. గ‌త ఆదివారం ఫినాలే ముగియ‌గా అభిజీత్ విన్న‌ర్‌గా నిలిచాడు. ర‌న్న‌ర్‌గా అఖిల్‌, మూడో స్థానంలో సోహైల్ ఉన్నాడు. ఇన్నాళ్ళు బిగ్ బాస్ హౌజ్‌లో ఉన్న వీరు బ‌య‌ట‌కు వ‌చ్చాక ఫుల్ చిల్ అవుతున్నారు. ప‌లు ఇంట‌ర్వ్యూలు ఇస్తూ అంద‌రిలో ఉన్న అనుమానాల‌ని క్లారిఫై చేస్తున్నారు. అయితే సోహైల్ విష‌యానికి వస్తే మెహబూబ్ సైగ చేయ‌డం వ‌ల‌న‌నే సోహైల్ రూ.25ల‌క్ష‌ల రూపాయ‌లు తీసుకొని బ‌య‌ట‌కు వ‌చ్చాడ‌ని ఇద్ద‌రిని తెగ ట్రోల్ చేస్తున్నారు.
డబ్బులు తీసుకునే ఆఫర్‌ గనుక వస్తే వదిలిపెట్టొద్ద‌ని మెహబూబ్ సిగ్నల్‌ ఇచ్చినట్టు సోష‌ల్ మీడియాలో జోరుగా ప్ర‌చారం జ‌రుగుతున్న క్ర‌మంలో సోహైల్ స్పందించాడు. మంగళవారం సోహైల్ తన ఇన్‌స్టాగ్రామ్‌లో లైవ్‌ వీడియోలోకి వ‌చ్చి నెటిజ‌న్స్ అడిగిన ప్ర‌శ్న‌ల‌న్నింటికి స‌మాధానం ఇచ్చాడు. మెహబూబ్ సైగ విష‌యం కూడా ప్ర‌స్తావ‌న‌కు రాగా, దీనిపై స్పందించిన సోహైల్.. బిగ్ బాస్ హౌజ్‌లో ఏం జ‌రుగుతుంద‌నేది ఎవరికి తెలియ‌దు. ఎవ‌రు ఉంటారు, ఎవ‌రు పోతారో కూడా తెలియ‌దు. వాడు ఏదో గ్లాస్‌పై చేయి ప‌ట్టి అలా అన్నాడు, నాకు అస‌లు ఏం అర్ధం కాలేదు. టాప్ 3లో ఎవరుంటరనేది ఎవరూ జడ్జ్‌ చేయలేదు. నేడు విన్నర్‌ అయ్యే వాడినేమో, టాప్ 2లో ఉండే వాడినేమో. వాడు ఎలా చెప్తడు. వాడికి ఎలా తెలుస్తోంది. మెహబూబ్ బిగ్బాస్ కాదు అంటూ సోహైల్ ఆగ్ర‌హం వ్యక్తం చేశారు.
మెహబూబ్ ఏమ‌న్నాడో నాకు అర్ధం కాక అఖిల్‌ని కూడా అడిగాను. ఏదో ఒకటి ప‌ట్టుకొని వీడియోలు చేయ‌డం అస్స‌లు బాలేదు. ప‌ది సంవ‌త్స‌రాల క‌ష్టం మీద ఒట్టేసి చెబుతున్నా. వాడు అన్న‌ది నాకు అర్ధం కాలేదు. టాప్ 3లో ఉంటాన‌ని నాకు తెలియ‌దు. అస‌లు థర్డ్‌ ప్లేస్‌లో ఉన్న వాళ్లకు డబ్బులు ఇస్తారని మెహబూబ్‌కు ఎలా తెలుసు. నేను మోసం చేస్తే నా కెరీర్‌లో బాగుప‌డ‌ను. అభిజీత్ ఫ్యాన్స్‌కు చెబుతున్నా. నేను తప్పు చేయలేదు. బిగ్ బాస్ హౌజ్‌లో ఎప్పుడు ఏం జ‌రుగుతుందో ఎవరికి తెలియ‌దు అని సోహైల్ స్ప‌ష్టం చేశాడు.