పూనమ్ కౌర్ మరోసారి దర్శకుడు త్రివిక్రమ్ శ్రీనివాస్పై తన ఆరోపణలను బయటపెట్టేసింది. గతంలో కొన్నిసార్లు ఈ అంశాన్ని హైలైట్ చేసినా, ఈసారి మరింత దూకుడుగా వ్యవహరించారు. తన ఇన్స్టాగ్రామ్ ఖాతా ద్వారా వరుసగా రెండు పోస్టులు పెడుతూ.. తాను వదిలే ప్రసక్తే లేదని, తన వద్ద అన్ని ఆధారాలున్నాయని స్పష్టం చేశారు. ఆమె వ్యాఖ్యల్లో ప్రత్యేకంగా ఓ రాజకీయ నాయకుడి పేరు లేకపోయినా, త్రివిక్రమ్ను రాజకీయ స్థాయిలో ఎవరో కాపాడుతున్నారని అభిప్రాయపడ్డారు.
ఈ విషయాన్ని తాను ఇప్పటికే ‘మా’కు (మూవీ ఆర్టిస్ట్స్ అసోసియేషన్) ఈమెయిల్ రూపంలో ఫిర్యాదు చేసినట్టు చెప్పారు. ఇదే విషయాన్ని ఝాన్సీతోనూ చర్చించానని, ఆమెతో జరిగిన చాటింగ్ స్క్రీన్షాట్లను కూడా బయటపెట్టారు. ఇందువల్ల ఈ అంశం మళ్లీ దృష్టిలోకి వచ్చింది. గతంలో త్రివిక్రమ్పై ఎలాంటి అధికారిక చర్యలు తీసుకోకపోవడాన్ని పూనమ్ తీవ్రమైన నిరసనగా పేర్కొన్నారు.
పూనమ్ చేసిన తాజా వ్యాఖ్యల్లో “నా జీవితాన్ని నాశనం చేసిన వ్యక్తిపై ఎటువంటి విచారణ జరపకుండా, పరిశ్రమలోని కొందరి సహకారంతో మౌనం పాటించటం బాధాకరం” అని ఆరోపించారు. ఇప్పటికే మలయాళ సినిమా పరిశ్రమలో జరిగిన మీటూ కేసు, కొరియోగ్రాఫర్ జానీ మాస్టర్ అంశాల తరహాలో పూనమ్ కేసు కూడా పరిశీలించాల్సిన అవసరం ఉందని ఆమె అభిప్రాయపడ్డారు. ఇప్పటి వరకూ త్రివిక్రమ్ ఈ ఆరోపణలపై ఒక్కసారి కూడా స్పందించలేదు. ఇకనైనా త్రివిక్రమ్ ఈ అంశంపై స్పందిస్తారా? అనే ఆసక్తికర ప్రశ్న ఇప్పుడు సోషల్ మీడియాలో చర్చనీయాంశంగా మారింది.