బుట్టబొమ్మ పూజా హెగ్డే ప్రస్తుతం తెలుగులో రెండు సినిమాలు చేస్తూ బిజీగా ఉంది. ఒకటి ప్రభాస్ రాధేశ్యామ్ కాగా రెండోది.. అఖిల్ మోస్ట్ ఎలిజబుల్ బ్యాచ్‌లర్. ఇలా ఈ రెండు సినిమా షూటింగ్‌లతో అటు ఇటు తిరిగేస్తూ ఉంటోంది. ఒక షెడ్యూల్ అక్కడ.. మరో షెడ్యూల్ ఇక్కడ అన్నట్టు బిజీబిజీగా గడిపేస్తోంది. ఇటలీ షెడ్యూల్ పూర్తయ్యాక పూజా హెగ్డే బ్యాచ్‌లర్ షెడ్యూల్‌లో ప్రత్యక్షమైంది. మళ్లీ ఇక్కడ పూర్తవ్వడంతో అక్కడికి చెక్కేసింది.
ప్రస్తుతం పూజా హెగ్డే రాధేశ్యామ్ సెట్‌లోనే ఉంది. ఈ మధ్యే రాధేశ్యామ్ సినిమా అప్డేట్‌ను దర్శకుడు రాధాకృష్ణకుమార్ ఇచ్చాడు. దాదాపు వంద రోజుల పాటు వెయ్యి మందికిపైగా ఆర్టిస్ట్‌లు కష్టపడి చేసిన యాక్షన్ సీక్వెన్స్ అద్భుతంగా వచ్చాయని, అవి నెవ్వరో బిఫోర్ అనేలా ఉన్నాయంటూ డైరెక్టర్ అంచనాలు పెంచేశాడు. అయితే మొత్తానికి రాధేశ్యామ్ సినిమాలో రొమాన్స్‌తో పాటు భారీ యాక్షన్ సీక్వెన్స్‌లున్నాయని చెప్పకనే చెప్పేశాడు.
తాజాగా పూజా హెగ్డే ఓ ఫోటోను షేర్ చేసింది. అందులో పూజా క్యూట్‌గా తన మొహాన్ని తిప్పుకుంది. కళ్లు మూసుకుని ఓ ఫోటోను దిగింది. అయితే ఆ ఫోటోకు ఆమె పెట్టిన క్యాప్షన్ బాగుంది. ఓ ఫోటో తీసుకోవాలని ఉంది.. కానీ ఇప్పుడు అంతా తిరుగుతోన్నట్టు అనిపిస్తోందంటూ చెప్పుకొచ్చింది. అంటే షూటింగ్‌లో బాగానే అలిసిపోయినట్టు కనిపిస్తోంది. రాధేశ్యామ్ సినిమా షూటింగ్‌లో అది 87వ రోజు అని .. ప్యాకప్ చెప్పేశామని తెలిపింది. మొత్తానికి పూజా హెగ్డే మాత్రం సోషల్ మీడియాలో ఇలా రచ్చ రచ్చ చేస్తూనే ఉంది.