ఐపీఎల్ 2025లో కోల్‌కతా నైట్ రైడర్స్ (కేకేఆర్) ఆశించిన ఫలితాలు సాధించలేక తీవ్ర నిరాశలో ఉంది. డిఫెండింగ్ ఛాంపియన్ గా టోర్నీలో అడుగుపెట్టినప్పటికీ, ఇప్పటివరకు 9 మ్యాచ్‌ల్లో కేవలం 3 విజయాలు మాత్రమే అందుకుంది. ఈ పరాజయాలకు ప్రధాన కారణంగా కేకేఆర్ నిలుపుకున్న ఆటగాళ్ల ఘోర వైఫల్యం నిలిచింది.
సునీల్ నరైన్, ఆండ్రీ రస్సెల్, రింకూ సింగ్, వరుణ్ చక్రవర్తి, హర్షిత్ రాణా, రమణ్‌దీప్ సింగ్‌లను కేకేఆర్ మెగా వేలానికి ముందు రిటైన్ చేసుకుంది. వీరిని నిలుపుకోవడంలో కేకేఆర్ మొత్తం రూ.69 కోట్లు ఖర్చు చేసింది. కానీ ఈ సీజన్‌లో ఈ ఆటగాళ్లు ఒక్కరూ కూడా పూర్తి స్థాయిలో ప్రభావం చూపలేకపోయారు. ముఖ్యంగా రింకూ సింగ్ మరియు రస్సెల్ ప్రదర్శనలు అభిమానులను తీవ్రంగా నిరాశపరిచాయి.
రింకూ సింగ్‌కు రూ.13 కోట్లు ముట్టజెపిన కేకేఆర్, అతడి నుంచి మించిపోయే ఆట చూపుతాడని ఆశించింది. కానీ 9 మ్యాచ్‌ల్లో అతడు కేవలం 133 పరుగులే చేయగలిగాడు. ఇదే విధంగా సునీల్ నరైన్ రూ.12 కోట్లకు నిలిపుకున్నా, బ్యాటింగ్ లో 151 పరుగులతోనే పరిమితమయ్యాడు. బౌలింగ్‌లోనూ అతడి రెగ్యులర్ మ్యాజిక్ కనిపించలేదు.
వరుణ్ చక్రవర్తి కూడా మొదటి కొన్ని మ్యాచ్‌లు మినహా ఫ్లాప్‌గా నిలిచాడు. ఆండ్రీ రస్సెల్ కూడా ఈ సీజన్‌లో త‌న ఫామ్‌ని చూపలేకపోయాడు. రెండో ఇన్నింగ్స్ మాంత్రికుడిగా పేరున్న రస్సెల్, ఈ సారి జట్టుకు నిలకడైన మద్దతు ఇవ్వలేకపోయాడు. హర్షిత్ రాణా, రమణ్‌దీప్ సింగ్‌లు కూడా పెద్దగా ప్రభావం చూపలేకపోయారు. మొత్తానికి కేకేఆర్ రిటెన్షన్ ప్లాన్ దారుణంగా విఫలమైందని చెప్పొచ్చు. భారీ మొత్తం ఖర్చు చేసినా, ఫలితాలు రాకపోవడం వలన ఇప్పుడు కేకేఆర్ మిగతా మ్యాచ్‌ల్లో గట్టిగా పోరాడాల్సిన పరిస్థితి నెలకొంది. ఇక ముందు జాగ్రత్తలు తీసుకోకపోతే ప్లేఆఫ్స్ ఆశలు కూడా గాలిలో కలిసిపోవచ్చు.
