Sreekanth: తన ఊర్లో చాలా మంది హీరో కృష్ణ గారికి ఫ్యాన్స్ అయితే, తాను మాత్రం చిరంజీవి గారికి ఫ్యాన్ అని ప్రముఖ నటుడు శ్రీకాంత్ తెలిపారు. కొట్టుకోవడం అలాంటివేం తమ మధ్య జరగలేదు కానీ, కొన్ని ఆర్గ్యుమెంట్స్ మాత్రం జరిగేవని ఆయన చెప్పుకొచ్చారు. కానీ ఇండస్ట్రీకి వచ్చిన తర్వాత మాత్రం అందరి వ్యక్తిత్వాలు తెలుస్తాయని ఆయన అన్నారు. అలా ఆయన్ని దగ్గర్నుంచి చూశాక కృష్ణ గారు ఇంత స్వీట్గా ఉంటారా, ఇంత బాగా మాట్లాడతారా అని అనిపించినట్టు ఆయన తెలిపారు. షూట్కు రాగానే పలకరిస్తూ, సరదాగా మాట్లాడుతూ, జోక్స్ వేసేవారని ఆయన చెప్పారు. అప్పుడప్పుడు ఇంకొకర్ని ఏడిపిస్తూ చాలా జాలీగా ఉండేవారని శ్రీకాంత్ అన్నారు.
ఇకపోతే కృష్ణ గారు చాలా ఫ్రాంక్గా ఉంటారని, అసలేం దాచుకోరని ఆయన చెప్పారు. తాను ఆయనతో కలిసి పనిచేసేటపుడు చిన్న వాళ్ల నుంచి అందరూ కూడా ఆయన్ని చాలా ఇష్టపడేవారని ఆయన తెలిపారు. అప్పటివరకూ ఆయనంటే మామూలు హీరోగా మాత్రమే తెలుసన్న శ్రీకాంత్, పర్సనల్గా ఆయనతో ప్రయాణం చేశాక ఆ అభిప్రాయం మారిపోయిందని ఆయన చెప్పారు.
నిజంగా చెప్పాలంటే తనకు మెగాస్టార్ చిరంజీవి గారి ఇన్సిపిరేషన్తోనే సినిమాల్లోకి వచ్చానని శ్రీకాంత్ అన్నారు. తనకు సినిమాలంటే, యాక్టింగ్ అంటే ఇంట్రస్ట్ కలిగింది కూడా చిరంజీవి గారి సినిమాలు చూసిన తర్వాతే అని ఆయన స్పష్టం చేశారు. ఆయన మీద అభిమానమే తనను ఇక్కడి వరకూ తీసుకొచ్చిందని ఆయన తెలిపారు.